नयाँ दिल्ली । नयाँ दिल्लीस्थित इजरायली दूतावासको बाहिरी क्षेत्रमा विस्फोट भएको सूचनापछि अर्धसैनिक बल दूतावासबाहिरको क्षेत्रमा तैनाथ गरिएको छ ।

प्रहरीका अनुसार दूतावासमा दुई दिनपहिले विस्फोट भएको भन्ने खबर प्रहरीलाई आएपछि प्रहरी त्यहाँ पुगेको हो ।दूतावास क्षेत्रवरिपरि बिहीबार आवतजावतमा प्रतिबन्ध लगाइनुका साथै अर्धसैनिक बलको तैनाथी गरेका दृश्यहरू देखिएका छन् ।

दिल्ली प्रहरीलाई मंगलबार चाणक्यपुरी कूटनीतिक क्षेत्रस्थित इजरायली दूतावासनजिकै ‘विस्फोट’ भएको फोन आएको थियो । तर, अधिकारीहरूले घटनास्थलमा त्यस्तो केही नभेटिएको बताएका थिए । विस्फोट भएको सूचनासहितको फोन दिल्ली फायर सर्भिसले साँझ ६ बजे प्राप्त गरेको थियो । बुधबार घटनाको छानबिन गर्न राष्ट्रिय अनुसन्धान एजेन्सी एनआईएलाई खटाइएको थियो ।

अनुसन्धानका लागि दिल्ली  प्रहरीले  सीसीटीभी फुटेज जाँचपछि दुई ‘सन्दिग्ध’ लाई नियन्त्रणमा लिएको छ । यद्यपि अधिकारीहरूले उनीहरूको संलग्नता भने पुष्टि गरेका छैनन् ।

स्रोतका अनुसार मंगलबार साँझ इजरायली दूतावासनजिकै घुमिरहेका दुई व्यक्ति ‘विस्फोट’ घटनाका शङ्कास्पद व्यक्तिका रूपमा देखा परेका छन् । स्रोतका अनुसार ‘सीसीटीभी फुटेजमा घटनाको समयमा दुई जना उक्त क्षेत्रमा घुमिरहेका देखिन्छन् ।

घटनामा उनीहरूको भूमिका भने अझै प्रस्ट हुन सकेको छैन । थप अनुसन्धानपछि उनीहरू घटनाको समयमा त्यस क्षेत्रमा के गर्दै थिए भन्ने प्रस्ट हुनेछ ।

प्रहरीले  सन्दिग्ध व्यक्ति कसरी त्यहाँ पुगे र के गरे भन्ने पत्ता लगाउन वरपरका सीसीटीभी जाँच गरिरहेको र उनीहरूकोे पहिचानका लागि पनि प्रयास गरिरहेको बताएको छ । दिल्ली प्रहरीले मंगलबार साँझ ‘विस्फोट’ बारेको जानकारीका सम्बन्धमा इजरायल दूतावासनजिकै राजदूतलाई सम्बोधन गरेको पत्र फेला पारेको छ ।

इजरायली दूतावासलाई अङ्ग्रेजीमा लेखेको पत्रमा धम्कीपूर्ण शब्दहरू प्रयोग गरिएको थियो । चिट्ठीमा नाम लेखिएको समूह सर अल्लाह रेजिस्टेन्सको खोजी भएको बताइएको छ ।