काठमाडौँ । सय किलो सुन तस्करी प्रकरणमा पक्राउ परेका रोहन अडुकियालाई केन्द्रीय अनुसन्धान ब्युरोले फिर्ता पठाएको छ । शुक्रबार राजस्व अनुसन्धान विभागबाट सशस्त्र प्रहरीसहितको टिम रोहनलाई जिम्मा लगाउन महाराजगञ्जस्थित ब्युरोमा पुगेका थिए ।

पक्राउ परेका रोहन व्यापारी राकेश अडुकियाका पुत्र हुन् । प्रहरीले साउन १० मा राकेशको घरमा छापा मारेको थियो । यद्यपि राकेशले आफ्नो घरमा छापा नमारिएको दाबी गरेका थिए । रोहनबारे थाहा नभएको भन्दै ब्युरोका अधिकृतहरुले शुक्रबार उनलाई जिम्मा लिएनन् ।

राजस्व अनुसन्धान विभागको पत्रको आधारमा रोहनको पासपोर्ट नम्बर जेड-६३९६४२१ लाई अध्यागमन कार्यालयले कालो सूचीमा राखेको थियो । दिल्लीबाट नेपाल फर्केका अडुकियालाई कालो सूचीको आधारमा त्रिभुवन विमानस्थल अध्यागमन कार्यालयले प्रहरीको सहयोगमा पक्राउ गरेर राजस्वमा बुझाएको थियो ।

राजस्व अनुसन्धान विभागका कर्मचारीले १ सय किलो सुन सम्बन्धी फाइल सीआईबीमा पठाएको भन्दै अडुकियालाई सीआईबीको जिम्मा लगाउन महाराजगञ्जमा पठाए । तर, ब्युरोले जिम्मा नलिएपछि उनलाई अध्यागमन विभागमै राखिएको छ ।

रोहनलाई अहिले अध्यागमन विभागमा राखिएको त्रिभुवन विमानस्थल सुरक्षा कार्यालयका डीआईजी अर्जुन चन्दले बताए । उनले भने, ‘अहिले रोहनलाई अध्यागमनमा राखिएको छ ।’ इन्डिगो एयरबाट काठमाडौँ आएका रोहनलाई विमानस्थल प्रहरीले पक्राउ नगरेको चन्दले बताए । उनले भने, ‘पासपोर्ट कालो सूचीमा रहेछ, हामीले सुरक्षा मात्र दिएका हौँ ।’