काठमाडौं । अपुतालीको १० अर्ब २१ करोड रुपैयाँ हत्याउने चक्करमा लाग्दा काठमाडौंकी राणा थरकी एक युवतीले ९३ लाख रुपैयाँ गुमाएकी छिन् । घटनामा संलग्नमध्ये दुई अभियुक्तलाई प्रहरीले पक्राउ गरेको छ तर, योजनाकार फरार छन् ।
पक्राउ पर्ने डडेल्धुराका योगेश शाही र काठमाडौंका सन्देश लामिछाने हुन् ।

विदेशबाट संगठित रूपमा साइबरमार्फत् गरिएको ठगी घटनाका मुख्य योजनाकारलाई पक्राउ गर्न सकेको छैन । नेपाल प्रहरीको साइबर ब्युरोले घटनाको अनुसन्धान गरिरहेको छ ।

‘काठमाडौंकी एक धनाढ्य परिवारकी युवतीलाई क्यानडाको एक बैंकमा रहेको अपुतालीको ७८ मिलियन अमेरिकी डलर दिने भनेर कसैले प्रलोभन देखायो । त्यसबापत कागजात मिलाउनुपर्ने भन्दै युवतीबाट उनीहरूले ९३ लाख रुपैयाँ असुल गरे । त्यसपछि उनीहरू सम्पर्कविहीन भए । घटनामा सामाजिक सञ्जाल प्रयोग भएको छ । धेरै व्यक्ति मिलेर घटना भएको देखिन्छ । प्रहरी विस्तृत अनुसन्धानमा लागेको छ,’ साइबर ब्युरोका प्रवक्ता एसपी पशुपति रायले भने । ब्युरोका अनुसार राणालाई सामाजिक सञ्जाल ट्विटरमार्फत् एक अपरिचितले ‘फलो’ गर्यो । उनले अपरिचितको प्रोफाइल हेरिन् । उनको पेसा उल्लेख थियो, ‘सिआइओ, रोयल बैंक अफ क्यानडा’ । राणाले पनि उनलाई फलो गरिन् । त्यसलगत्तै दुईबीच वार्तालाप (इनबक्स च्याट) सुरु भयो ।

केही साता दुईबीच सामान्य कुराकानी भए । यसैक्रममा अपरिचितले क्यानडानिवासी ‘माइक क्लर्क राणा’ नामक व्यक्तिको कोभिड- १९ का कारण मृत्यु भएको र रोयल बैंकस्थित उनकोे खातामा ७८ मिलियन अमेरिकी डलर (१० अर्ब २१ करोड ८० लाख रुपैयाँ) रहेको जानकारी दिए । उक्त सम्पत्ति हकदाबी गर्ने क्यानडामा कोही नभएको पनि उनले भने । कागजात मिलाउन सके उक्त सबै रकम राणाको नाममा ‘ट्रान्सफर’ गर्न सकिने उपाय सुनाए । सवाल १० अर्ब २१ करोड ८० लाख रुपैयाँको थियो । राणाको दिमागमा रकम कुनै हालतमा प्राप्त गर्ने लोभ जाग्यो । उनले अपरिचितको अफरबारे परिवारका सदस्यलाई पनि भनिन् ।

परिवारका सदस्यले अपरिचितको अफरलाई शंकाको नजरले हेरे । युवतीले अपरिचितसँग पुनः इनबक्स च्याट गरिन् । सोधिन्, ‘यति ठूलो रकम तिमीले किन मलाई नै ट्रान्सफर गर्न खोजिरहेका छौं ?’

अपरिचितले जवाफ फर्कायो, ‘मृतकको ‘सर नेम’ राणा हो । तिमी पनि राणा नै रहेछौ । हकदाबी गर्न कोही नभएका मृतकको सम्पत्ति बैंकमा राख्न मिल्दैन । त्यस्तो सम्पत्ति नजिकको नातेदारलाई दिनुपर्ने हुन्छ । मृतक र तिम्रो ‘सर नेम’ एउटै भएको हुँदा यो अफर तिमीलाई गरेको हुँ ।’

राणाले अपरिचितको भनाइमा विश्वास गरिन् । उक्त रकम जसरी पनि हात पर्ने मनस्थितिमा उनी पुगिन् । अब उनले रकम ट्रान्सफरका लागि आवश्यक प्रक्रिया बुझ्न अपरिचितसँग संवाद अघि बढाइन् । अपरिचितले होसियारीपूर्वक पहिलो चरणमा राणाको नागरिकतासहितको व्यक्तिगत कागजात सबै लिए । उक्त कागजात बैंकमा पेस गरेको फोटो खिचेर ह्याट्सएपमार्फत् राणालाई पठाए । केही दिनपछि अपरिचितले कागजातमा केही गडबड भएको र त्यसका लागि अधिवक्ता प्रयोग गर्नुपर्ने भन्दै रकम मागे ।

१० अर्ब २१ करोड प्राप्त गर्ने लोभमा फसेकी राणाले मागेजति रकम अपरिचितले पठाएको बैंक खातामा हालिदिइन् । अपरिचितले विभिन्न बहानामा पुनः थप रकम मागे, राणाले भुक्तानी गर्दै गइन् । करिब वर्ष दिनको बीचमा उनले नेपालकै फरक-फरक ११ वटा बैंकमा खातामा ९३ लाख पाँच हजार ६२ रुपैयाँ दाखिला गरिदिइन् ।

तर, अफरमा भनिएजस्तो १० अर्ब २१ करोड ८० लाख रुपैयाँ हात लागेन । बरु नयाँ-नयाँ बहानामा थप रकम माग्ने क्रम अझ बढ्यो । अनि मात्र राणाको मनमा अपरिचितप्रति शंका जाग्यो । उजुरी दिन प्रहरी कार्यालय पुगिन्, तर त्यसबेलासम्म ढिलो भइसकेको थियो । किनकि उनले आफूसँग भएको सबै सम्पत्ति गुमाइसकेकी थिइन् ।

प्रहरीले घटनाको अनुसन्धान गर्यो । नभन्दै अपरिचित र अपरिचितको ट्विटर अकाउन्ट नक्कली रहेको खुल्यो । सँगै मृतक भनिएका ‘माइक क्लर्क राणा’ पनि नक्कली रहेको खुल्यो । ठगिएको पुष्टि भएपछि युवती छाँगाबाट खसेझैँ भइन् । ब्युरोका प्रवक्ता रायले अपरिचित व्यक्तिले दिएको विभिन्न नेपालकै ११ बैंक खातमा ३० जेठ ०७९ देखि गत १९ फुगनसम्म ९३ लाख रुपैयाँभन्दा धेरै रकम जम्मा भएको देखिएको बताए ।

पीडित राणाले गत २५ फागुनमा ब्युरोमा जाहेरी दिएकी थिइन् । विभिन्न मुलुकमा रहेका आपराधिक समूह घटनमा संलग्न रहेकाले ब्युरोले यस अवधिमा उनीहरूका दुई नेपाल एजेन्टलाई मात्रै पक्राउ गर्न सकेको छ । घटनाका ‘मास्टर माइन्ड’ फरार रहेका प्रवक्ता एसपी रायले बताए । उनले भने, ‘यसमा अन्तर्राष्ट्रिय गिरोह संलग्न छ । उनीहरूकै योजनामा घटना भएको देखिन्छ । उनीहरूका नेपाल एजेन्ट भने पक्राउ परेका छन् । विदेशमा रहेको हुँदा ‘मास्टर माइन्ड’ पक्राउ गर्न सकिएको छैन । प्रयत्न जारी छ ।’
टेकराज थामीले नयाँ पत्रिकामा समाचार लेखेका छन् ।