काठमाडौं । टेलिभिजन शो ‘कमेडी क्लब विथ च्याम्पियन’ केही समयका लागि बन्द भएको छ । ६९ वटा श्रृंखला प्रशारण भएको शो केही समयका लागि मात्रै बन्द भएको ‘कमेडी क्लब विथ च्याम्पियन’का प्रोडुसर तथा होस्ट विशाल भण्डारीले जानकारी दिए ।

‘१६ महिनाको हाम्रो यात्रा निकै रमाइलो भयो । यो लामो यात्रामा हामीलाई केही यमय ब्रेक पनि चाहिएको थियो, त्यसैले हामीले केही महिनाका लागि शो ब्रेक गरेका छौं’ बाह्रखरीसँग विशाल भन्छन्,‘हामी करिब चार महिनापछि पुनः नयाँ उर्जाका साथ दर्शकलाई हसाउँन आउने छौँ ।’

चार महिनापछि पुरानै टिम आउने तर थप परिस्कृत र परिमार्जित भएर आउने उनले बताए । ‘कमेडी क्लब विथ च्याम्पियन’ चार महिनाका लागि बन्द हुनुको मुख्य कारण भने स्ट्यान्डअप कमेडी रियालिटी शो ‘कमेडी च्याम्पियन’ हो । ‘कमेडी च्याम्पियन’ को सिजन–३ चाँडै प्रशारणको तयारीमा रहेको छ । यसलाई समय दिनु पर्ने भएकाले ‘कमेडी क्लब विथ च्याम्पियन’ केही समयका लागि बन्द भएको विशाल बताउँछन् ।

‘कमेडी च्याम्पियन’ सिजन–३ असोजबाट प्रशारण हुँदैछ । डिजिटल अडिसन लिइसकेको निर्माण पक्षले अहिले फिजिकल अडिसनको तयारी गरिरहेको छ । ‘कमेडी च्याम्पियन’को सिजन–१ को विजेता हिमेस पन्त हुन् भने दोस्रो सिजन भरतमणि पौडेलले जितेका थिए ।