काठमाडौं । सफल सांगीतिक जोडीको रुपमा परिचित लोकप्रिय गायक तथा सर्जक किरणबाबु पुन र गायिका टीका पुनको आवाजमा ‘मेरी जुनकिरी’ बोलको सुमधुर लोकदोहोरी गीत सार्वजनिक भएको छ ।

राजधानीको सामाखुसीस्थित बर्गर हाउसमा उक्त गीतका गायक, गायिका, अभिनेता, अभिनेत्री, निर्देशक, छायाँकार लगायत अन्य चर्चित कलाकारहरुको उपस्थितिमा कार्यक्रमको आयोजना गरि सो गीत सार्वजनिक गरिएको हो । गीत सार्वजनिक कार्यक्रममा गायक पुनले सो गीत फरक शैली अपनाएर तयार पारिएको बताए ।

कुमारसानु पुनले संगीत संयोजन गरेको सो गीत शंकरा रेकर्डिङ स्टुडियोमा रेकर्ड गरिएको हो । सिर्जन बरालको निर्देशन रहेको उक्त गीतको भिडियोमा मोडल प्रेम थापा र चाहना श्रेष्ठको अभिनय रहेको छ ।

राम केसीको छायाङ्कन रहेको उक्त गीतको भिडियोलाई राजकुमार मगरले भिडियो सम्पादन गरेका हुन् । बाग्लुङ जिल्लाको मनोरम ठाउँहरुमा छायाङ्कन गरिएको उक्त गीत किरणबाबु पुनको अफिसियल युटुब च्यानलमार्फत् सार्वजनिक गरिएको छ ।