☰
विश्वका धनाढ्य एलन मस्क २०० बिलियन डलरबाट तल झरेपछि फ्रान्सका धनाढ्य बेर्नार्ड आर्नो विश्वकै सबैभन्दा धनी व्यक्ति हुन पुगे । यसरी अवसरको ढोका खुलेर विश्वमा चर्चित हुन पुगेका आर्नोको सफलताका पछाडि धेरै कथाहरू जोडिएका छन् ।
उमेरका हिसाबले ७३ वसन्त पार गरिसकेका आर्नो विलासिताका सामान उत्पादन गर्ने एलभीएमएच कम्पनीका सहसंस्थापक तथा सीइओ हुन् । आर्नोले मस्कलाई गत महिना नै पछाडि पारिसकेका हुन् ।
त्यो सफलता यो महिनासम्म पनि कायमै छ । यसले केही समय निरन्तरता पाउने फोर्ब्स र ब्लुम्वर्गले प्रक्षेपण गरिरहेका छन् । फोर्ब्सका अनुसार आर्नोको सम्पत्ति १९१ बिलियन डलर रहेको छ भने उनै आर्नोको सम्पत्ति मात्र १७२ बिलियन रहेको ब्लुमवर्गले बताइरहेको छ ।
तर १९१ बिलियन वा १७२ बिलियन भने पनि आर्नोको सम्पत्ति एलन मस्कको भन्दा धेरै नै हुन्छ । उनी आजै मात्र माथि उक्लिएका होइनन् । वर्षौंदेखि उनी अर्बपति नै रहँदै आएका हुन् ।
भनिन्छ, आर्नोले यसरी सम्पत्ति सङ्कलन गर्न स्टिभ जब्स र वारेन बफेटको रणनीतिहरू उपयोग गरेका थिए । यिनै रणनीतिको सफल कार्यान्वयनका कारण आर्नो सफलताको सिढि चढ्न सफल भएका थिए ।
सन् १९७० बाट आर्नोले आफ्नो बाबुले चलाएको फार्म सम्हालेका थिए । यस अतिरिक्त घरजग्गा कारोवार, टेक्सटाइल र अन्य खुद्रा विजनेस पनि अपनाएका थिए । यी सबै विजनेसले उनमा प्रौढता ल्याइदिए ।
सन् १९८५ मा मात्र आएर उनले एलभीएमएच् कम्पनी सुरू गरेका थिए । यो कम्पनी त्योभन्दा पहिले ‘क्रिस्चियन डायर’का नाममा खोलिएको थियो र यो टाट पल्टिएको थियो । यो डायर कम्पनीलाई आर्नोले यसका मालिकहरूबाट १५ मिलियन डलरमा खरिद गरेर पुनः सञ्चालनमा ल्याएका थिए ।
एलभीएमएच् नाममा रूपान्तरण गरेपछि यसले उत्पादन गर्दै आएका विलासिताका सामानहरूमा ९७.५ प्रतिशत उत्पादन फ्रान्सेली बजारमा खपत हुने गरिरहेका छन् । यस अतिरिक्त विश्व बजारमा पनि यसको उत्पादनको मागमा कमी आएको छैन ।
यो एलभीएमएच् कम्पनीबाट उत्पादित सामानहरूमा आर्नोले त्यत्तिकै गुणस्तरियता र बजार बटुल्न सकेका भने होइनन् । यसका लागि उनले ठूलो मेहनत र सोच लगानी गर्नु परेको थियो । त्यो थियो, एलभीएमएच् निर्माणका लागि दुई ठूला कम्पनीहरूको एकता वा ‘मर्ज’ ।
यसका लागि उनले लुई भिटों र मों हेनेसी जस्ता ठूला कम्पनीहरूबीच मर्ज गराएर एलभीएम्एचलाई उचाइमा पुर्याएका थिए । यी सबै विलासिताका सामान उत्पादक तथा वितरक कम्पनीहरू थिए ।
आजका दिनमा त्यस कम्पनीका सिइओ रहेका आर्नोले उक्त कम्पनीको ५० प्रतिशत भन्दा बढी शेयर आफ्नो नाममा राख्न सफल भएका छन् । यसको बजार मूल्य ३९० विलियन डलर रहेको छ । कुरो त के पनि रहेको छ भने सन् २०२२ को पहिलो ९ महिनाभित्रै एलभीएमएच् कम्पनीले ६० बिलियन डलरको कारोवार गरेर रेकर्ड नै कायम गरेको थियो ।
आर्नो स्वयम्ले आफ्नो कम्पनीको खुद्रा बिक्रि गरिने ठाउँहरूमा बारम्बार अध्ययन र अनुगमन गरिरहन्छन् । उनको यो जाँच, परख र सुधारका कारण सामान बिक्रिमा कुनै पनि उल्लेख्य खोट र अलोकप्रियता देखिदैन । समयमै आवश्यकता र मागको ख्याल गर्ने आर्नो सामानको गुणस्तरीयता ल्याउन पछि पर्दैनन् ।
उनले आफ्ना प्रतिस्पर्धी तथा उदीयमान प्रतिस्पर्धीको निकै ख्याल गर्छन् । यति सम्म कि उनी एक दिनमा २५ विभिन्न ठाउँका खुद्रा बिक्रि कक्ष र वितरण केन्द्रमा पुगी रिपोर्ट लिने गर्दछन् ।
यसै कारण उनी फ्रान्सेली बजारमा एक नम्बरका सामान उत्पादन गर्न सफल हुँदै आएका छन् । यसले उनको कम्पनीको साख गिर्न दिएको छैन । उनको कम्पनी ब्राण्डेड पनि बनेको छ र फेसनेवल पनि बन्न सफल बनिरहेको छ ।
यो कम्पनीले प्रतिकात्मक सामान उत्पादन गरेर आफ्नो गौरवमय विरासतलाई निरन्तरता दिन सफल भइरहेको छ ।
