काठमाडौं । फागुन १३ गते भारतको सिलिगुडीबाट झापाको चारआली डिपोमा ल्याइएको ४ वटा ट्यांकरमा भएको ८० हजार डिजलमा मट्टितेल मिसाइएको पाइएको छ । चालकको मिलेमतोमा मट्टिचेल मिसाइएको हुन सक्ने आशंका लागेसँगै नमुना परीक्षण गर्दा छानबिन समितिले छानबिन गर्दा मिसावट भएको पुष्टि गरेको छ ।

घटनाको अध्ययन गर्न गठन गरिएको ३ सदस्यीय छानबिन समितिले नेपाल आयल निगमको केन्द्रीय ल्याबमा नमुना परीक्षण गर्दा ८० हजार लिटर डिजलमा मट्टितेल मिसावट भएको प्रमाणित गरेको हो।

ल्याबले ४ वटा ट्यांकरमा रहेको ८० हजार लिटर डिजलमा मट्टितेल मिसावट गरिएको प्रतिवेदन आइतबार निगमलाई बुझाइएको छ। निगम स्रोतका अनुसार झापाबाट काठमाडौंको केन्द्रिय ल्याबमा परीक्षणका लागि ल्याइएको डिजलको नमुना परिक्षण गर्दा मट्टितेल मिसावट गरिएको पाइएको हो।

निगमले ४ वटा ट्यांकर चालक र ढुवानी व्यवसायीलाई कारबाही गर्ने तयारी थालेको बताएको छ। नवदुर्गा आयल स्टोर्सको नाममा रहेको मे १ ख २१४९, माता पाथीभरा आयल स्टोर्सको नाममा रहेको मे १ ख २१५१, उत्तरगंगा यातायात प्रालिको नाममा रहेको ना ७ ख १५०७ र रिजाल आयल सप्लायर्स एन्ड ट्रेडर्सको नाममा रहेको ना ७ ख ६९७४ नम्बरको ट्यांकरमा आएको कुल ८० हजार लिटर डिजलमा मिसावट भेटिएको थियो।