☰
प्रतिनिधिसभाको आवधिक निर्वाचनमार्फत् प्राप्त जनादेश मिलिजुली सरकारको हुन आएपछि नेकपा माओवादी केन्द्रका अध्यक्ष पुष्पकमल दाहाल प्रचण्डको नेतृत्वमा नयाँ सरकार गठन भइसकेको छ ।
नयाँ सरकारले विश्वासको मत लिने गरी संसद अधिवेशन पनि आह्वान भइसकेपछि संसदले आफ्ना गतिविधि अघि बढाउने देखिएको छ । पहिलो त सरकारले लिने विश्वासको मत हो ।
दोस्रो कुरा, सभामुख र उपसभामुख चयनको विषय पनि रहेको छ । वर्तमान सत्ता गठबन्धनबाट योग्य व्यक्ति यसका लागि उपयुक्त हुने छन् । जनताको आशा छ, यस्ता जिम्मेवार पदहरू भागबण्डाका आधारमा गरिने छैनन् ।
त्यसपछि राष्ट्रपति र उपराष्ट्रपति निर्वाचनको चर्चा पनि चुलिएर आएको छ । यी ओहदा राष्ट्र र राष्ट्रिय गरिमासँग जोडिएर आउनु पर्छ, हल्का खेल, भागबण्डा र मजाकका रूपमा होइन ।
संसदले निर्वाह गर्नुपर्ने यी कार्यभार देश र जनता साक्षी राखेर गर्नुपर्छ । किनकि यिनै ओहदाले वर्तमान राजनीतिक प्रणाली र प्रक्रियालाई विश्वसनीय बनाउँदै लैजाने हुन् ।
तर प्रचारमा भागबण्डाको गन्ध नमिठो गरी आउन थालेपछि जनतामा पलाएको आशा र हौसला सेलाउँदै जान थालेको छ । यसले अन्ततः सबै कुरा र जिम्मेवारी निस्सार र विश्वासरहित बनाउँदै लानसक्छ ।
नेपाली काँग्रेस सबैभन्दा ठूलो दल भएपछि फेरि पनि ज्योतिषिलाई हेराइ देखाइ गरी देउवा नै प्रधानमन्त्री हुने छनक देखिएपछि जनतामा छाएको निराशाको वातावरण यो गठबन्धनले सदुपयोग गरेको छ ।
यसले पनि काम गर्दा ढंग नपुर्याउने, भागबण्डामा जे पनि टुंग्याउने गर्न थालेमा देशमा अर्को समीकरण नबन्ला भन्न सकिन्न । यसलाई वर्तमान सत्ताधारी गठबन्धनले गम्भीरताका साथ लिनुपर्छ ।
देशको नेतृत्व भागबण्डाले गर्न सक्दैन । क्षमता र हैसियतले गर्न सक्छ । त्यस्ता फिगरहरूको खोजी जरूरी छ । यसका लागि हैसियत र ल्याकत जरूरी छ । च्याखे थापने र बार्गेनिङ गर्ने प्रवृत्ति निरूत्साहित गरिनु पर्छ ।
यदि यी कुराहरूमा ध्यान दिइएन भने हरेक प्रयत्न पानीको फोकामा परिणत हुन बेर लाग्ने देखिदैन ।
