काठमाडौं। कैलालीको सत्ति भन्सार कार्यालय खक्रौलाका कार्यालय प्रमुख भन्सार छलीमा आफै मुछिएपछि सम्पर्कविहीन भएका छन् ।

गत शुक्रबार पुस १ गते आफ्नै सरकारी गाडीमा भन्सार छली गरी अवैध एसी ल्याएको अवस्थामा कार्यालय प्रमुख विमल कुमार साह फेला परेका हुन् ।

उनले शनिवार कार्यालयमा कार्यरत नायब सुब्बा तुलसीराम थारुलाई निमित्त प्रमुखको जिम्मेवारी सुम्पिएर कार्यालय छोडेको बुझिएको छ । निमित्तको जिम्मेवारी पाएका नासु थारुले आफूलाई विना जानकारी निमित्तको जिम्मेवारीसहितको पत्र छोडेर गएको बताए ।

भन्सार विभागका निर्देशक तथा सूचना अधिकारी पुन्य विक्रम खड्काले घटनाबारे सत्यतथ्य बुझ्न सम्बन्धित शाखालाई निर्देशन दिइसकेको बताए । विना भन्सार सामान ल्याउन नपाइने बताउँदै छानबिनपछि कारबाही प्रक्रियामा जाने सूचना अधिकार खड्काको भनाइ छ ।

भन्सार कार्यालयका कार्यालय प्रमुख साहले भन्सार कार्यालयको सरकारी नम्बर प्लेटको गाडीमा ४ थान एसी ल्याएर आएको अवस्थामा कार्यालय परिसरमै फेला परेका थिए । कार्यालयको से१झ ३०२ नम्बरको गाडीमा प्यानासोनिक कम्पनीको ४ थान एसीसहित रंगेहात फेला परेका हुन् ।

दुई देशीय कस्टम बैठकमा सहभागी हुन भारत गएका शाहले त्यहाँबाटै एसी ल्याएका थिए । भन्सार सम्बन्धी रिपोर्टिङका लागि भन्सार कार्यालय पुगेकमा सञ्चारकर्मीले उनलाई त्यहाँ नभेटेछि पर्खेका थिए । उनी एसिका  साथ गाडीमा आएको देखेपछि प्रश्न गर्दा घरायसी प्रयोजनका लागि ल्याएको स्वीकार गरे । उनलाई एसिको बिल माग्दा उनले बोली फेरेको बताइएको छ ।