☰
काठमाडौं । ४ डिसेम्बर सन् १९८२ मा पिता बोरिस्लाभ र आमा दुसङ्काबाट जन्मेका निकको पूरा नाम निकोलस जेम्स भुजिसिक हो । क्षेत्रफलका अनुसार संसारकै छैटौँ ठुलो देश अस्ट्रेलियामा उनको जन्म भएको थियो । उनी हात र खुट्टाबिना नै जन्मेका थिए जसलाई मेडिकल भाषामा ‘टेट्रामेलिया सिन्ड्रोम’ भनिन्छ । उनी किन त्यसरी जन्मे भन्नाका लागि वास्तवमा कुनै चिकित्सकीय कारण छैन् । जन्मपश्चात् नर्सले उनलाई आमाको सामु ल्याउँदा आमाले उनलाई हेर्नसमेत इन्कार गरेकी थिइन् । अन्ततः निककी आमा र बुबाले आफ्नो छोरोको अवस्थालाई स्वीकार गरे र त्यसलाई “तिनीहरूको जीवनमा परमेश्वरको योजना” को रूपमा ग्रहण गरे ।
निकका दुईवटा ससाना कुरुप पैताला भने थिए । जन्मँदा तिनका पैतलाका औँलाहरू गाँसिएका भए तापनि कुनै कुरो समात्न, पाना पल्टाउन र अन्य क्रियाकलापहरू गर्न ती औँलाहरूलाई प्रयोग गर्न सकुन् भनेर शल्यक्रिया गरेर ती अलग गरिए । विद्युतीय व्हिलचिएर, कम्प्युटर र मोबाइल फोन चलाउनलाई तिनी आफ्ना पैतलाहरू प्रयोग गर्न सक्छन् । तिनले आत्महत्याको प्रयास नगरेका होइनन्, तर तिनी सफल हुन सकेनन् । तिनको यस्तो असाधारण शारीरिक अवस्थाका बाबजुद पनि तिनको बाल्यावस्था भने साधारण किसिमले बितेको थियो ।
एक दिन आमाले निकलाई अखबारमा प्रकाशित कुनै एक जना अपाङ्गता भएको मानिस देखाइन् जसले तिनलाई हौसला मिलेको थियो । त्यसपछि तिनले आफ्नो प्रार्थना गर्ने समूहमा आफ्नो मुख खोल्न थाले । २१ वर्षको उमेरमा तिनले स्नातक पूरा गरे । जम्मा ३ फिट ३ इन्च उचाइ भए तापनि तिनी सगरमाथाजस्तो उच्च दर्शन देख्छन् । मानिसहरूलाई तिनी यसरी प्रेरणा दिन्छन्, “मसित नभएको कुरोको लागि परमेश्वरसित रिसाउने वा मसित भएको कुरोको लागि परमेश्वरप्रति धन्यवादी हुने भनी दुईमध्ये एउटा छनोट गर्न सक्छु मैले ।”
ख्रिस्टाब्द २००५ मा निकले लाइफ विदआवट लिम्ब्स नामक अन्तर्राष्ट्रिय मुनाफारहित संस्था र सेवाकार्य स्थापित गरे । त्यसको दुई वर्षपछि तिनले अर्को कम्पनीको थालनी गरे । एउटा लघु फिल्ममा नायकको भूमिकामा देखा परेका निकलाई त्यसको सर्वोत्कृष्ट अभिनेताको पुरस्कार दिइएको थियो । निक नयाँ जन्म पाएका ख्रीष्टियान वक्ता हुन् । ख्रिस्टाब्द २००६ मा निक अमेरिका प्रस्थान गरे र २०१२ मा केनी मियाहरासित वैवाहिक बन्धनमा बाँधिए । यी दम्पत्तिलाई परमेश्वरले ४ सन्तान दिनुभएको छ ।
१. यदि तपाई चमत्कार प्राप्त गर्न सक्नुहुन्न भने एक बन्नुहोस् ।
२. हातको रेखालाई विश्वास नगर, किनभने हात नहुनेहरुको पनि भाग्य हुन्छ ।
३. हाम्रो जीवनका चुनौतीहरू हाम्रो विश्वासलाई बलियो पार्नका लागि छन् ।
४. यदि तपाई अगाडि बढिरहनु भयो भने केही घाउहरू चाँडै निको हुन्छन् ।
५. जबसम्म तपाई सजग हुनुहुन्छ र आफ्ना भावनाहरूको नियन्त्रणमा हुनुहुन्छ, नकारात्मक विचारहरूले सकारात्मक परिणामहरू निम्त्याउन सक्छ ।
६. डर जीवनको सबैभन्दा ठूलो अशक्तता हो ।
७. आशा गुमाउनुभन्दा अघि म कहिल्यै अपांग भइनँ ।
८. तपाईसँग अगाडि के हुन्छ त्यसको संकेत नहुन सक्छ, तर जीवनले तपाईमाथि काम गर्न दिनुभन्दा जीवनमा कार्य गर्नु उत्तम हो ।
९. समायोजनहरू बाटोमा आवश्यक हुन्छ, किनकि जीवन सधैँ रमाइलो हुँदैन तर यो बाँच्न लायक छ ।
१०. तपाईको अभाव अनुसार तपाई बाँच्नु हुँदैन ।
११. जीवनमा दुई किसिमका जोखिमहरू छन्, प्रयास गर्ने खतरा र प्रयास नगर्नुको खतरा ।
१२. जोखिम जीवनको भाग मात्र होइन, जीवन हो ।
१३. स्वर्ग जानुभन्दा पनि राम्रो कुरा अर्को एक व्यक्तिलाई आफूसँग जान प्रोत्साहित गर्नु हो ।
१४. चरित्र सहज र शान्त रूपमा विकसित गर्न सकिँदैन । केवल परीक्षण र कष्टको अनुभवद्वारा आत्मालाई सुदृढ पार्न, महत्वाकांक्षा प्रेरणा दिन र सफलता प्राप्त गर्न सकिन्छ ।
१५. कसैले पनि यो सोच्नु गलत हो कि, म राम्रो छैन र म कुनै कुराको लायक छैन् ।
