‘कम्मरै भाँच्ने हो, नाच्ने हो
फलानाले के भन्छन्, ढिस्कानाले के भन्छन्
छोड्देउ दाई, अब नाच्ने हो ।’

तीजको समय नजिकिँदै गर्दा बजारमा धेरै किसिमका तीज गीतहरु आएका छन् । नेपाली समाजमा तीज आउनु भन्दा लगभग एक महिना अघिदेखि यस्ता गीतहरुको रौनक देखा परिहाल्छ ।

आफ्नो संस्कृति र परम्परा जोगाउने उद्धेश्यले र कयौंले त तीज गीत रेकर्ड गरेर आफ्नो इतिहास सुरक्षित गर्ने उद्धेश्यले गीतहरु रेकर्ड गर्ने गर्छन् । आज भोली त गीतका म्यूजिक भिडियो नै बनाएर सामाजिक सञ्जाल तथा अनलाइन मिडियाहरुमा प्रचार प्रसार गर्ने चलन आइसकेको छ ।

तीज पर्व हिन्दू संस्कारमा हुर्किएका महिलाहरुले मनाउने एउटा महत्वपूर्ण चाड हो । यो चाड भाद्र शुक्ल द्वितीयादेखि पञ्चमीसम्म ४ दिन मनाइन्छ ।

तीजमा हिमालय पर्वतमा राज गरेका शिवको आराधना गरिनुका साथै नाचगान र मनोरञ्जन समेत गर्ने गरिन्छ । नेपाली हिन्दू महिलाहरूद्वारा स्वतन्त्र र आनन्दमय रूपमा मनाइने तीज अन्य धर्म र जातजातिका नेपाली महिलाहरूले पनि हर्षोल्लासका साथ मनाउन थालेका छन् ।

यो पर्व मूख्यरूपले नेपालभर मनाइन्छ भने भारतका कुनै कुनै प्रान्तमा पनि मनाइन्छ । भनिन्छ, शिवको प्रेममा परेकी हिमालय पुत्री पार्वतीले शिवको स्वास्थ्य तथा शरीरमा कुनै बाधा उत्पन्न नहोस् भनेर पहिलो वर्त राखेकी थिइन् । त्यो दिन यही हरितालिका तीजको दिन थियो । त्यसै दिनदेखि आजसम्म हिन्दू नारीहरूले यो पर्व मनाउँदै आएका छन् ।

यसै बीच वर्षा शर्मा र शोभा तिवारीले पनि यस वर्षको ‘कम्मरै भाँच्ने हो, नाच्ने हो’ बोलको तीज गीत बजारमा ल्याएका छन् । गीतमा गायिका शर्मा र तिवारीकै स्वर रहेको छ भने गीतलाई शोभा तिवारीले संगीतवद्द गरेकी छिन् ।

जिनियस म्यूजिक प्रालिले उत्पादन गरि बजारमा ल्याएको सो गीतमा शिला गजुरेलको साथमा गायिका द्वयले नै अभिनय गरेका छन् ।