महात्मा बुद्ध घामतर्फ पीठ फर्काएर बसिरहेका थिए । सधै सूर्यतिर सम्मुख भई रापिलो घामको आनन्द लिने बुद्धले पिठ्युँ फर्काएको देखेर आनन्द उत्सुक भए ।

उनले सोधे, ‘प्रभुले घामतर्फ पिठ्युँ फर्काएर बसेको आज पहिलोपटक देख्दैछु ।’  बुद्धले भने ‘अब तथागत साँझ पखको घामतर्फ पिठ्युँ फर्काएर बस्ने उमेरमा प्रवेश गरेको छ आनन्द !’

आनन्दले बुद्धको पिठ्युँमा मालिस गरिदिए । बुद्धको छाला झोलिएको थियो  । तिघ्रा मसिना भएका थिए ।

आनन्दले भने, ‘म हजुरसँग रहन थालेको यतिका वर्ष बिते । अनुहारमा कस्तो विलक्षण कान्ति थियो । शरीर कस्तो सुन्दर र बलिष्ठ  थियो । अब त छाला पनि पातलो भयो । बाहिरबाट शरीरका हाड गन्न सकिन्छ ।’

बुद्धले भनेका थिए , ‘यदि धेरै वर्ष बाँच्न चाहन्छौ भने बूढो हुन नडराऊ आनन्द !’