राजधानी सहर काठमाडौंमा वितरण गरिने जारको पानी पिउनयोग्य छैन । जारहरूमा पानीसँगै फोहर र अन्य वस्तु भेटिन थालेपछि कतै यही पानीका कारण हैजा फैलिएको त होइन भन्ने आशंमा बल पुगेको छ ।

उपत्यकाभित्रै हैजाको महामारी फैलिइरहेको अहिलेको अवस्थामा दैनिक पैसा तिरेर स्वास्थ्य रक्षाका लागि भनी किनेर खाइने जारको पानी नै अस्वस्थकर देखिएपछि यसले सर्वसाधारणमा समेत खैलाबैला मच्चाएको छ ।

पछिल्लो समयमा हैजा फैलनुको स्रोतको खोजी भइरहेको छ । स्थानीय तथा जिल्ला तहका विभिन्न निकायहरू सबैभन्दा बढी पानीका स्रोतहरूको नियमन र निगरानीमा लागिपरेका छन् ।

हैजाले सताइरहेको जिल्ला काठमाडौंका सहायक प्रमुख जिल्ला अधिकारी माधवप्रसाद शर्मा पनि चेकजाँच गर्ने काममा लागिपरिरहेका छन् । यसैक्रममा शर्माको टिम चाँगुनारायण नगरपालिका–३ झौखेलमा पुगी विभिन्न खानेपानी कम्पनी अनुगमन गर्दा जारमा लेउ तथा फोहर भेटिएको जनाइएको छ ।

स्वस्थ खाने पानीका लागि भनेर जार तथा बोटलमा भरिएका खानेपानीमा यस्तै अस्वस्थकर कुरा तथा फोहर भेटिने गरेको छ । स्वास्थ सुरक्षाका लागि भन्दै प्रति बोटल २० रुपैयादेखि ३० सम्म तिर्ने गरेका छन् सर्वसाधरणले पनि ।

एउटा जारको पानीलाई ५० रुपैयाँदेखि त्योभन्दा बढीसम्म मूल्य तिर्ने गरिएको छ । तर तिनै जारमा लेउ र अन्य फोहरहरू देखिने गरेका छन् । प्लास्टिकका बोटल र जारहरूमा बाहिर नयाँ लेवल टाँसिए पनि पानी भने प्रदुषित रहने गरेको पाइएको छ ।

सञ्चार माध्यमहरूका साथै सर्वसाधरण जनताको तहबाट जनगुनासो व्यापक रूपमा बढेपछि र उपत्यकामा हैजाको प्रकोपमा न्युनीकरण हुन नसकेपछि जिल्ला प्रशासन कार्यालयको नेतृत्वमा खाद्य प्रविधि तथा गुण नियन्त्रण विभाग, उपभोक्ता महासङ्घ, जिल्ला घरेलु कार्यालय, उद्योग वाणिज्य सङ्घ, पत्रकार तथा विषय विज्ञ र सरोकारवालाको संयुक्त टोली आफ्नो कार्यक्षेत्रभित्र खट्न थालेको देखिएको छ ।

यसको परिणाम कस्तो आउँछ, त्यो त हेर्न बाँकी नै छ । तर सघन मानव वस्ती रहेको काठमाडौं उपत्यकामा पानीबाट सर्ने रोगहरू समयमै नियन्त्रण गर्न सकिएन भने हैजालगायतका रोगहरूले भयावह स्थिति सिर्जना गर्ने आशंकालाई कम आँक्न सकिदैन ।