☰
काठमाडौं । सत्तासीन दलहरूले चुनावी गठबन्धन गरेसँगै ओली दबाबमा परेका छन् । नेपाली कांग्रेस, नेकपा (माओवादी केन्द्र), जनता समाजवादी पार्टी (जसपा), नेकपा (एकीकृत समाजवादी) र राष्ट्रिय जनमोर्चा (राजमो)ले आसन्न स्थानीय तह निर्वाचनमा चुनावी तालमेल गर्ने निर्णय गरेसँगै नेकपा (एमाले) अध्यक्ष केपी शर्मा ओली दबाबमा परेका हुन् ।
वैशाख ३० मा हुने स्थानीय तह निर्वाचनका लागि पाँच दलहरूले साता दिनअघि चुनावी गठबन्धन गर्ने निर्णय गरेका छन् । उनीहरूले गरेको उक्त निर्णय पश्चात् एमाले अध्यक्ष ओली चर्को दबाबमा परेका हुन् । २०७४ मा तीनै तहको चुनावमा बहुमत ल्याएका ओलीलाई यसपटक पहिलेकै विरासत जोगाउन दबाब परेको हो ।
पुरानै विरासत जोगाउन ओली देश दौडाहामा छन् । उनी पार्टीका विभिन्न कार्यक्रममा हिमालदेखि तराई–मधेससम्म पुग्ने गरेका छन् । त्यहाँ पुगेर उनले अन्य राजनीतिक दलका नेता–कार्यकर्ताहरूलाई आफ्नो पार्टीमा प्रवेश गराउँदै आएका छन् ।
पार्टीको कार्यक्रमकै सिलसिलामा ओली चैत १७ गते नेपालगञ्ज बाँके पुगे । त्यहाँ पुगेर उनले राष्ट्रिय प्रजातन्त्र पार्टी (राप्रपा)का महामन्त्री धवलशमशेर राणासँग भेटवार्ता गरेका थिए । उक्त भेटवार्तामा ओलीले राणालाई भने, ‘तपाईं हाम्रो पार्टीबीच चुनावी तालमेलका लागि केन्द्रमा संवाद जारी छ ।’ ओलीको कुरा सुनेपछि राणाले केन्द्रको संवाद आफ्ना लागि सुखद् हुने बताए ।
ओली र राणाको भेटवार्ता पश्चात् एमाले र राप्रपाबीच चुनावी तालमेलबारे चर्चा चल्यो । यसलाई मूर्तरूप दिन ओली र राप्रपाका अध्यक्ष राजेन्द्र लिङ्देन चरणवद्ध संवादमा रहेको स्रोत बताउँछ । त्यस्तै भर्खरै गठित नयाँ दल राष्ट्रिय प्रजातन्त्र पार्टी (राप्रपा) नेपालसँग पनि चुनावी तालमेल गर्न ओली राजी देखिएका छन् ।
राजसंस्था पुनःस्थापनाको पक्षमा उभिँदै आएको राप्रपा (राजेन्द्र लिङ्देन) र हिन्दु धर्मको ओकालत गर्दै आएको राप्रपा नेपाल (कमल थापा)सँग नेपाल कम्युनिस्ट पार्टी (एमाले)ले चुनावी तालमेल गर्ने सम्भावना नजिकिएको छ । तालमेलकै लागि ओली, लिङ्देन र थापाबीच पटक–पटक संवाद हुँदै आएको ओलीनिकट स्रोतले बतायो ।
ओलीको अभिव्यक्तिमा राजेन्द्रको तुष कायमै
एमाले अध्यक्ष केपी शर्मा ओली र राप्रपा अध्यक्ष राजेन्द्र लिङ्देनबीच बाच्छाको तुष कायमै रहेको स्रोतको निकिर छ । गत मंसिरमा सम्पन्न नेपाली कांग्रेसको १४औं महाधिवेशनमा ओलीले व्यंग्य गर्दै लिङ्देनलाई बाच्छाको हुंकारको संज्ञा दिए । त्यसयता ओली र लिङ्देनबीच वैयक्तिक तुष बढेको देख्न सकिन्छ ।
तथापि चुनाव नजिकिएसँगै कमजोर महसुस गरेका एमालेलगायत अन्य साना राजनीतिक दलबीच तालमेल हुने भएको छ । यद्यपि ओली र लिङ्देनको हकमा भने तुषले के गर्छ यसै भन्न सकिँदैन । तर, उनीहरू दुवैको गृहजिल्ला झापा हो । यस कारण उनीहरूबीच चुनावी तालमेल हुने वा नहुनेबारे सर्वत्र चासोको विषय बनेको छ । ओली र लिङ्देनबीच तुष भएपनि झापामा राप्रपाको बाहुल्यता भएकाले ओली चुनावी तालमेल गर्न चाहान्छन् । अन्यथा ओलीले झापा हाँक्न मुस्किल हुनेछ ।
कमल थापासँग ओलीको चुनावी तालमेल होला ?
राप्रपाबाट विभाजित राप्रपा नेपालसँग पनि एमालेले चुनावी तालमेल गर्ने पक्का भएको छ । केही महिनाअघि राप्रपाबाट विभाजन भएको राप्रपा नेपालका अध्यक्ष कमल थापाले एमालेसँग चुनावी तालमेल गरेर जाने बताउँदै आएका छन् । त्यस्तै राप्रपा नेपालका प्रवक्ता सुशील श्रेष्ठले ओली र थापाबीच चुनावी तालमेल गर्ने निश्चित भइसकेको बताए ।
यो विषयलाई टुंगोमा पुर्याउन एमालेको तर्फबाट देवेन्द्र दाहाल र राप्रपा नेपालको तर्फबाट आफूलाई जिम्मेवारी सुम्पिएको प्रवक्ता श्रेष्ठले बताए । ‘२०७४ मा एमालेले जहाँ–जहाँ जितेको छ, त्यहाँ आफ्नो पार्टीले दाबी नगर्ने उनले बताए’, ‘हामीले (राप्रपा) हुँदा जहाँ–जहाँ जितेका छौँ, त्यहाँ समस्या छैन, जहाँ अन्य पार्टीले जितेका छन्, त्यहाँ हाम्रो संख्याका आधारमा दाबी हुन्छ ।’
२०७४ मा पार्टीले ५९ वटा वडाहरू जित्यो, त्यहाँ पनि स्वाभावैले हाम्रो पार्टीको दाबी रहन्छ । यस्तै यसअघि राप्रपाले जितेका स्थानीय तहमा पनि दाबेदारी रहने श्रेष्ठले बताए । यद्यपि एमालेले राप्रपा र राप्रपा नेपालसँग तालमेलबारे सहमति गरेको खण्डमा दुई राप्रपा मिलाउन ओलीलाई निकै कठिन हुने कतिपयको धारणा छ । यी दुई पार्टीबीच सम्बन्धमा तीक्तता रहेको र मत पनि विभाजित हुने भएकोले यो अवस्था सिर्जना भएको हो ।
राजावादी र धार्मिक दलसँग चुनावी तालमेलबारे एमालेका नेता के भन्छन् ?
एमाले युवा नेता महेश बस्नेतले आगामी तीनै तहको चुनावमा एमाले एक्लै भिड्ने बताए । उनले भने, ‘हामी प्रतिपक्षी दलहरू मिलेर जानेभन्दा पनि एमाले एक्लै गठबन्धनसँग भिड्न काफी छ, अन्य साना दलसँग चुनावी तालमेल गर्नु उपयुक्त हुँदैन ।’ हामी एक्लैले बहुमत ल्याउन सक्ने आँट र जनमत छ यसका लागि अन्य दलसँग तालमेल गर्नुु र नगर्नुको औचित्य छैन,’ बस्नेतले भने ।
त्यस्तै उपाध्यक्ष विष्णु पौडेल भन्छन्, ‘हामीले विगतमा धेरैपटक सरकारको नेतृत्व गरिसकेका छौँ । हाम्रो सरकारले गरेका राम्रा कामको फेहरिस्त, विवरण र आगामी दिनमा गर्ने कार्य सम्पादनको प्रतिबद्धता लिएर जनतामाझ जान्छौं र आसन्न निर्वाचनमा सानदार जित हात पार्छौँ, यसका साथै पालिकाका पदाधिकारी र सदस्यहरूमा ७० प्रतिशत जित्ने हाम्रो लक्ष छ, पार्टी प्रतिकुल हुन गएमा न्यूनतम ६० प्रतिशत पालिकाहरूमा पदाधिकारी र सदस्य जित्छौं अनि हामीलाई कोही कसैसँग तालमेल गर्नु छैन ।’
