सिन्धुपाल्चोक । सिन्धुपाल्चोकमा पनि बर्ड फ्लु देखिएको छ। बलेफी गाउँपालिकामा स्थानीय किसानले पालेको बोइलर कुखुरामा बर्ड फ्लु भेटिएको पुष्टि भएको हो ।

बलेफी गाउँपालिका वडा न ८ लामोसाँघुमा एक किसानले पालेको ४ हजार कुखुरामध्ये २५ सय कुखुरा धमाधम मर्न थालेपछि फागुन १० गते काठमाडौँ त्रिपुरेश्वरमा नमूना परीक्षणका लागि लगिएको थियो ।

नमूना परीक्षणबाट बर्ड फ्लु पुष्टि भएको बलेफी गाउँपालिका पशु सेवा प्राविधिक दीपेन्द्र दंगालले जानकारी दिए । बर्ड फ्लु पुष्टि भएसँगै फर्मलाई सिल गरिएको छ ।

प्राविधिक दंगालका अनुसार तीव्र गतिमा फैलावट हुने एच फाईभ एन वान बर्ड फ्लु पुष्टि भएपछि अन्य फर्मका कुखुरालाई पनि परीक्षणका लागि काठमाडौँ पठाइसकेको छ ।

कुखुरा फर्ममा बर्डफ्लु देखिएपछि गाउँपालिकाले किसानलाई उच्च सतर्कता अपनाउन अनुरोध समेत गरेको छ ।