विराटनगर । मोरङको धनपालथान–७ कमलपुरस्थित उखुबारीमा दुई तथा ललितपुरमा एक गरी तीन जनाको हत्या प्रकरणको रहस्य प्रहरीले खोलेको छ ।

व्यावसायिक पार्टनरको हत्याका पाँच आरोपीलाई प्रहरीले पक्राउ गरेको छ भने तीन जनालाई शुक्रबार सार्वजनिक गरेको छ ।

पक्राउ पर्नेमा सिरहा नगरपालिका–२१ घर भई काठमाडौंको बल्खु बस्ने ३१ वर्षीय अनिल मण्डल, मोरङको जहदा गाउँपालिका–४ सिस्वनी घर भएका अमित साह भनिने दिनानाथ सोनार र मोरङको धनपालथान गाउँपालिका–७ कमलपुरका ६२ वर्षीय नासिर आलम, सुनसरीको देवानगन्ज–६ का १८ वर्षीय हकिम मन्सुरी र मोरङको रंगेली–३ का ३० वर्षीय महमद सुभाम रहेका छन् ।

विभिन्न व्यवसायमा साझेदारी गरेका पार्टनरलाई हत्या गरी एकल बनाउने उद्देश्यले मण्डलले योजनाबद्ध रूपमा हत्या गरेको प्रहरीले जनाएको छ । तीनमध्ये मण्डल मुख्य आरोपित हुन् ।

पक्राउ परेका अन्य भने सहयोगी भएको प्रहरीको भनाइ छ । यो समाचार नेपाल समाचार दैनिकमा छ ।