पूर्वप्रधानमन्त्री केपी शर्मा ओली कोभिड महामारीको पिसिआर परीक्षण पोजिटिभ देखिएको चौथो दिनमै सार्वजनिक कार्यक्रममा सहभागी भएर सबैलाई चकित पारिदिएका छन् । उनले पारेको आश्चर्यचकित सकारात्मक भने होइन । त्यो समाज तथा जनस्वास्थ्यका लागि निकै हानिकारक र दण्डनीय हो ।

तर ठूला मानिसले आफै स्वास्थ्य प्रोटोकल मिचिरहेका छन् । समाजका ‘फिगर’ र अगुवा भनिएकाहरु नै यसो गर्न थालेपछि स्वास्थ्यको मापदण्ड पालना कसले गर्नुपर्ने हो, थाह भएन । तर नेपालका नेता र उनीसरहका ठूला मानिस भने कानुनभन्दा माथि छन् भन्ने यसले देखाइरहेको छ ।

पूर्वप्रधानमन्त्री ओली मात्र होइन, सबैले संविधान, ऐन र कानुनमाथि दाइँ लगाउने गरिरहेका छन् । अहिले पनि स्वास्थ्य मापदण्द केवल औपचारिक साबित हुन गएको छ । मानौ त्यो फगत निर्णय गरी जनतालाई देखाउनका लागि सार्वजनिक गरिने कुरा मात्र हो ।

जो नीति निर्माण गर्ने थलोमा बसेको हुन्छ, ऊ आफैले वा उसको निर्देशनमा निर्णय हुने गरेकाले उसका लागि यो बाध्यकारी छैन । अथवा, उसले यसबाट उन्मुक्ति पाएको हुन्छ । होला, ओली बाहिर सार्वजनिक भएकाले उनको आलोचना गरियो,  तर भित्र कोठाचोटा र बरण्डामा हरेक नेताहरुले भेटघाट र चियापान तथा गुटगत अड्डा जमाउन छाडेका छैनन् ।

सबैभन्दा बढी र सबैतिर महामारी फैलने र फैलाउने काम नेताहरुबाटै भएको छ । देशभरका नेता कार्यकर्ता भेट गर्ने र आआफ्ना गाउँमा फर्कने भएकाले देशभर कोभिडका नयाँ नयाँ भेरियन्ट यिनैबाट पनि सार्ने/सराउने काम हुने गरिरहेको छ । नेताले राम्रै होस् भनेर यस्ता कामहरुलाई निरन्तरता दिने गरेका होलान् पनि ।

तर अन्तर मन र नियत भने उनीहरुको सफा देखिएन । सबैभन्दा जानेको, बुझेको र दूरदृष्टि भएको मानिस नेता भएको हुनु पर्छ । उनीहरुले के काम गर्दा समाजलाई अप्ठेरो पर्छ, गलत सन्देश जान्छ र नकारात्मक काम गर्न सघाउ पुर्याउँछ भन्ने पनि थाह भएको हुनु पर्छ ।

यदि यसो हो भने नेताले सोच्ने कुरा लामो र पछिसम्मका लागि सकारात्मक हुने गरी सोच्नु पर्छ । यसका लागि नेताको नियत सफा हुनु पर्छ । ताकि यसले स्वयम्ले गर्न खोजेका गलत परिणाम दिने कामहरु नगर्न सचेत र सतर्क बनाओस् ।