☰
जनकपुरधाम । राष्ट्रियसभा निर्वाचनमा अवरोध गरेर तोडफोड गर्ने जनमत पार्टीका सात कार्यकर्तालाई प्रहरीले पक्राउ गरेको छ ।
निर्वाचनमा चुनावमा अवरोध गर्ने क्रममा तोडफोडमा उत्रिएका जनमत पार्टीका सात कार्यकर्ता पक्राउ परेको प्रहरीले जनाएको हो ।
पक्राउ पर्नेमा धनुषा औरही गाउँपालिका–५ का विमलेश मण्डल, सप्तरी कञ्चनरुप नगरपालिका–१ का पप्पु पञ्जियार, सप्तरीकै तिलाठी कोइलाडी गाउँपालिका–२ का सुशीलकुमार मण्डल, सिरहाको सिरहा नगरपालिका–४ का जिवछ यादव, सप्तरी बोदेबर्साइन नगरपालिका–१ का अर्जुन साह, महोत्तरी एकडारा गाउँपालिका–४ का रामविनय पासवान र सर्लाही कविलासी नगरपालिका–२ का सुवेक मण्डल रहेको धनुषा जिल्ला प्रहरी कार्यालयका प्रहरी नायव उपरीक्षक दीपक राईले जनाएका छन् । प्रहरीसँगको झडपमा जनमत पार्टीका केही कार्यकर्ताका साथै चार प्रहरी पनि घाइते छन् ।
स्थिति नियन्त्रणमा लिन ४२ राउण्ड अश्रुग्याँस प्रहार गरेको पनि जिल्ला प्रहरी कार्यालयले जनाएको छ ।
जनमत पार्टीका कार्यकर्ताले प्रदेश सांसद्, पालिका प्रमुख र उपप्रमुखहरू सवार सरकारी गाडी तोडफोड गरेका थिए । गाडीमा सवार पाँच जनप्रतिनिधि घाइतेसमेत भएका छन् ।
