काठमाडौं । गायिका तारादेवीको १६ औं पुण्य स्मृतिको अवसर पारेर राजधानीमा ‘सम्झनामा तारा देवी’ नामक एक सांगीतिक कार्यक्रम आयोजना गरिएको छ ।

तारादेवी स्मृति फाउण्डेसनले आयोजनामा अष्टनारायण पिक्चर सिनेमा हल बालाजुमा भौतिक दुरी कायम गरेर आयोजना गरिएको कार्यक्रममा करिब आधा दर्जन गायक गायिकाले उनका लोकप्रिय गीत गाएका थिए । गायिका गीता पाण्डेले राष्ट्रकवि माधवप्रसाद घिमिरेको शब्द तथा नातिकाजीको संगीत रहेको ‘फूलको थुँगा…’ गीत प्रस्तुत गरेकी थिइन् । उक्त गीतमा तारादेवीको बायोपिक बनाएर आस्था कला केन्द्र कलाकारले प्रस्तुत गरेका थिए ।

यस्तै कार्यक्रममा गायिका प्राश्ना शाक्यले चाँदनी शाहको शब्द तथा नातिकाजीको संगीत रहेको ‘उकाली ओरालीहरूमा’, गायिका जीना रसाईलीले ‘आमा भएर बाची हेर’ गाएर सांगीतिक माहोल तताएका थिए । कार्यक्रममा गायक समेत रहेका सांसद रामवीर मानन्धरले गायिका गीता पाण्डेसँग ‘मुस्कानका लहरहरु’, गायिका प्राश्ना शाक्यसँग ‘तिम्रो नाम अझै छ ओठमा’ युगल गीत प्रस्तुत गरेर कार्यक्रमस्थल तारादेवीमय बनाएका थिए ।

कार्यक्रममा गायिका सरस्वती मानन्धर, लजना मानन्धर, रेकिषा केसी, पुष्पा नेपाली साथै गायक सुरेश मानन्धर, धर्मरत्न मानन्धर, किशोर बिश्वकर्मा लगायतको समेत प्रस्तुतिले दर्शक रमाएका थिए । काठमाडौं महानगरपालिकाको नगरप्रमुख विद्यासुन्दर शाक्य समेत सहभागी कार्यक्रममा गीत संगीतका कार्यक्रममा सधै महानगरपालिकाले सहयोग र सहकार्य गर्ने बताए ।