काठमाडौं । नवौँ महाधिवेशन गर्ने तयारीमा रहेको एमालेको जनवर्गीय संगठन युवा संघभित्र समानान्तर कमिटी गठन गर्ने तयारी भएको छ ।

पुस २८ र २९ गते पोखरा भएको सचिवालय बैठकबाट बनाइएको आयोजक कमिटीप्रति असन्तुष्ट रहेका युवा संघका उपाध्यक्ष लगायतका पदाधिकारीले समानान्तर कमिटी बनाउने तयारी गरेका हुन् ।

युवा संघका इन्चार्ज महेश बस्नेतले एकलौटी ढंगबाट आयोजक कमिटी बनाएका कारण सचिवालय गठनलगायतका विषयमा असन्तुष्ट रहेका नेताहरुले पार्टी अध्यक्ष केपी शर्मा ओलीलाई भेटेर निर्णय नसच्याए बस्नेतविरुद्ध समानान्तर कमिटी बनाउने जानकारी गराइसकेका छन् ।

उपाध्यक्षहरू अमित लामा, रोशन बस्नेत, उर्मिला सुनुवार, विष्णुप्रसाद घिमिरे, तिरण गौतमलगायत तीन दर्जन नेताहरुले पोखरामा भएको बैठक बहिस्कार गरेर उनीहरूले पार्टी अध्यक्ष ओली, महासचिव शंकर पोखरेल, संगठन विभाग प्रमुख खगराज अधिकारी, मोर्चा जनसंगठन प्रमुख भानुभक्त ढकाललाई लिखित उजुरीसमेत दिइसकेका छन् ।

फागुन ११ गते महाधिवेशन गर्ने सर्वसम्मत निर्णय गरेर आयोजक कमिटी बनाउने बेलामा युवा संघभित्र पोलिटब्युरो सदस्य महेश बस्नेत हाबी भएपछि विवाद उत्पन्न भएको थियो ।

युवा संघभित्र महेश बस्नेतले नेतृत्व गरेदेखि नै भद्रगोल भएको छ। विगत ९ वर्षदेखि महाधिवेशन हुन सकेको छैन । ९ वर्षमा ८ जना नेताहरूलाई टिका लगाउँदै अध्यक्ष बनाइएको थियो ।

अब फागुनमा महाधिवेशन भएमा ९ वर्षमा ९ जना नै अध्यक्ष हुनेछन् । २०६९ साल फागुन १८ गते भएको आठौं महाधिवेशनमा दोस्रोपटक अध्यक्ष भएका बस्नेतले आफूपछि निरु पाललाई अध्यक्ष बनाएका थिए ।

महेश बस्नेत धेरै अगाडिदेखि हावी भएपछि त्यसको विरोधमा रमेश पौडेलले आवाज उठाउँदा उनलाई संगठनबाटै बाहिर राखेर खेलकुद महासंघ जिम्मा लगाइएको छ ।

एकता प्रक्रिया भंग भएपछि बस्नेतले पौडेललाई हटाएर अरूलाई नै अध्यक्ष बनाउन खोज्दा लफडा भएको थियो । तर पार्टी अध्यक्ष ओलीले नै पौडेललाई युवा संघको अध्यक्षको जिम्मेवारी दिएपछि बस्नेत भने केही समय बाहिरिएका थिए । यो समाचार नागरिक दैनिकमा छ ।