अष्ट्रेलियाको एक नगर परिषद सदस्यमा सिन्धुलीकी भद्रा वाइवा विजयी भएपछि नेपालीको निकै आकर्षक गन्तव्य बनिरहेको देश अष्ट्रेलिया अबका दिनमा कर्मथलोमा बन्दै जाने सकारात्मक सङ्केत देखिएको छ । वाइवा रोजल्याण्ड नगरपरिषद्मा त्यहाँको प्रतिपक्षी लेबर पार्टीको तर्फबाट स्थानीय तहको निर्वाचनमा उमेदवार बनेकी थिइन् ।

अस्ट्रेलियाको स्थानीय निर्वाचनमा नौ जना नेपालीमूलका उमेदवार मैदानमा उत्रिएका थिए । तर लेबर पार्टीबाट नगर सदस्य (काउन्सिलर) मा उम्मेदवार दिएकी भद्रा वाइवाले मात्र विजयको सौभाग्य प्राप्त गरेकी थिइन् । नेपालको सिन्धुली जिल्लामा घर भएकी वाइवा बैंकस्टाउन काउन्सिलको रोजल्यान्ड वडाको काउन्सिलर भएकी छिन् ।

त्यो वडामा लेबर पार्टीले एकलौटी विजय हासिल गरेको छ । कोभिड–१९ का बेलादेखि हाल पनि अष्ट्रलियाली जनताको जीवन रक्षाका लागि अहोरात्र खटिरहेकी वाइवा त्यहाँको अग्रपंक्तिकी नर्स हुन् ।

सन् २००८ मा अष्ट्रेलिया पुगेकी उनी त्यसको पाँच वर्षपछि सन् २०१३ देखि लेबर पार्टीको स्थानीय तहमा क्रियाशील हुँदै आएकी छिन् । उक्त पार्टीमा उनी रिभरउड कम्युनिटीको ‘बोर्ड अफ डिरेक्टर’ मा रहेकी छिन् ।

आप्रवासनको लहर चलेसँगै अहिले अष्ट्रेलियामा संसारका विभिन्न मूलका मानिस बसोबास गर्दै आइरहेका छन् । विश्व मानव समुदाय बन्ने यो क्रमसँगै अष्ट्रेलिया नेपालीको कर्मथलोमा पनि रुपान्तरण हुँदै जान थालेको छ ।

नेपालीहरु यस पटकको निर्वाचनमा मात्र होइन, योभन्दा पहिलेको संघीय निर्वाचनमा समेत उमेदवारी दिने र स्वस्थ निर्वाचन प्रतिस्पर्धामा उत्रने गर्दै आएका छन् । तर विजय हासिल गरेको भने यो नै पहिलो पटक हो ।