☰
काठमाडौँ। अमेरिकाको क्यालिफोर्नियाका एक बालक उनले गरेका अद्भूत कामका कारण चर्चाको शिखरमा छन् । ज्याक रिको नाम गरेका ती बालकलाई उनका विद्वताले चर्चामा ल्याएको हो ।
बालक रिकोले १५ वर्षको किशोर वयमै स्नातक डिग्री हासिल गरिसकेका थिए । यो डिग्री उनले चार वर्षको समयमा लिएको पाँचौं डिग्री हो । नेभाडा विश्वविद्यालयबाट १५ वर्षकै उमेरमा उनले स्नातक पूरा गरेर सबैलाई चकित पारिदिएका थिए ।
जन्मपछिका सुरुका ४ वर्षमा बालक रिकोलाई उनकी आमा रु एन्ड्राडेले घरमै शिक्षदीक्षा दिएकी थिइन् । दुई वर्षको नहुँदै बोर्डस् राख्ने प्रचलनमा रहेका नेपालीका लागि यो कुरा झनै आश्चर्य लाग्न सक्छ ।
घरमा दिइने शिक्षादीक्षा र पढ्ने कुरा सिध्याएपछि बल्ल उनी विद्यालय गएका थिए । त्यति बेलासम्म उनमा कौतुहलता, जिज्ञासा र खोजमूलक कममा निकै चासो बढ्दै गएको थियो । अध्ययनमा आश्चर्यजनक प्रगति गर्दै गएका उनलाई ११ वर्षको उमेरमा फुलरटन कलेजमा भर्ना गरिएको थियो ।
परीक्षामा उत्कृष्ट अंक ल्याएपछि उनको क्षमताको राम्रैगरी पहिचान हुन गयो । सानै उमेरमा उनलाई उच्च शिक्षाको अवसर पनि दिइयो । त्यसपछि उनी कलेज भर्ना भए । कलेजमा समकक्षी साथीहरुलाई उछिन्दै गरेका उनले छोटो समयमै उक्त शिक्षा पूरा गरे ।
कलेजकै उमेरमा उनले धेरै कुरा पढेर सिध्याए । यतिसम्म कि १३ वर्षको उमेरमै उनले ४ वटा एसोसिएट डिग्री पनि प्राप्त गरे । यसले उनमा रहेको अद्वितीय क्षमता र प्रतिभाको प्रष्फुटन गरायो । उनका साथी र छिमेकीहरु पनि अचम्भित भए ।
अध्ययनको सिलसिलाम उनले इतिहास, सामाजिक व्यवहार, कला र मानव अभिव्यक्ति तथा सामाजिक विज्ञानमा डिग्री हासिल गरिसकेका छन् । उनी क्यालिफोर्निया कलेजको डिग्री लिने पहिलो व्यक्तिमा दर्ज हुन पुगेका छन् ।
उनले स्नातक तहमा ३.७८ ग्रेड अंक प्राप्त गरेका छन् । अध्ययनमा निकै व्यग्र बालक रिको मास्टर डिग्री लिनका लागि तयारी गरिरहेका छन् । उनलाई धेरैले प्रश्न गर्ने र उनको मनोभाव बुझ्ने प्रयास गर्छन् ।
तर जो जसले जे सोधे पनि उनले ‘धेरै पैसा कमाएर बहिनीको हेरचाह गर्ने’ भन्दा अर्को कुरा गर्न चाहिरहेका देखिदैनन् । उनकी बहिनी अटिजम भन्ने स्मरणक्षिण हुने रोगबाट पीडित छिन् ।
(एजेन्सीको सहयोगमा)
