देशमा अहिले आर्थिक तरलता निकै छ । यसको अर्थ हो, आवश्यकताहरु धेरै छन्, तर खर्च गर्नका लागि पैसा छैन । मानिसले ऋण पाउन सकिरहेका छैनन् । वैंकले ऋण दिन सकिरहेका छैनन् ।

दिएका ऋणहरु पनि घर, घडेरी, जग्गा, प्लटिङ, हाउजिङ र गगनचुम्बी महल निर्माण मात्र छन् । यसको सिधा अर्थ हो, उत्पादनमा लगानी हुन सकिरहेको छैन । उपभोग्य तथा बिलासिताका सामानमा अत्यधिक राशी खर्च भैरहेको छ ।
देशको आफ्नो उत्पादनमा ह्रास आइरहेको छ । देश परनिर्भरतातर्फ धकेलिरहेको छ । यसका पछाडि खास कारणहरुले काम गरिरहेका छन् । यिनलाई राम्ररी केलाउनु जरुरी छ । यसका लागि मुख्य ४ कुरामा तत्काल सोचिनु र सुधार गरिनु पर्छ :

१. दार्शनिक तहको अन्यौलता :

सबैभन्दा पहिलो कुरा त अर्थ र अर्थतन्त्र के हो ? यसबारेमा बोध हुनु जरुरी छ । नेपालमा रहेका राजनीतिक दलका नेताहरुमा अर्थ, अर्थशास्त्र र अर्थनीतिको दार्शनिक अन्यौलता निकै भारी मात्रामा छ ।
पार्टीको नेतृत्व, सरकारको नेतृत्व गर्ने नेताहरुमा त यस्ता ज्ञान हुनै पर्छ । किनकि दलीय व्यवस्थामा सरकार चलाउने भनेको पार्टीले हो । पार्टीगत व्यवस्था नै संसदीय  व्यवस्था हो ।
त्यसैले जुन दलको नेतृत्वमा सरकार चल्छ, उसको चुनावी घोषणा पत्रमा व्यक्त प्रतिबद्धताले सरकारलाई प्रत्यक्ष वा अप्रत्यक्षमा रुपमा निर्देशन गर्छ नै ।