नेपालमा ओमिक्रोन भाइरस आइपुगिसकेको छ । रोकथाम र सतर्कताका हरेक उपाय अपनाउन निर्देशन, सुझाव तथा विभिन्न संयन्त्रहरु बनाउँदा पनि कोभिड–१९ को नयाँ उत्परिवर्तन ओमिक्रोन नेपालमा देखा परिसकेको छ ।

नेपालमा आएका एक विदेशी नागारिक र उनको सम्पर्कमा आएका अर्का विदेशी नागरिकमा यो भेरियन्ट देखा परेको हो । स्वास्थ्य मन्त्रालयले पुष्टि गरेअनुसार मंसिर ३ गते त्रिभुवन विमानस्थलमा आएका एक ६६ वर्षीय विदेशी नागरिक र उनीसँग सम्पर्कमा आएका ७१ अर्का नागरिकमा ओमिक्रोन देखापरेको छ ।

तीब्र गतिमा फैलनसक्ने अति संक्रामक यो भेरियन्ट नेपालमा भित्रिइसकेपछि यो अब फैलने क्रममा देखिएको छ । यद्यपि ओमिक्रोनबाट संक्रमित दुबै व्यक्तिहरु हाल आइसोलेसनमा राखिएका छन् । संयोगको कुरा भनौ उनीहरुसँग सम्पर्कमा आएका ६६ जनाको पिसिआर परीक्षण गर्दा कसैलाई पनि संक्रमण भएको देखिएको छैन ।

पहिलो पटक २४ नोभेम्बर २०२१ मा दक्षिण अफ्रिकामा पुष्टि भएको उत्परिवर्तन ओमिक्रोन भेरिएन्ट अहिले विश्वका ३५ देशहरूमा फैलिसकेको छ । प्रकृतिका हिसाबले यो निकै आक्रामक र संक्रामक देखिए पनि योभन्दा पहिलेका उत्परिवर्तनबाट भएको जस्तो ज्यानको क्षति अहिलेसम्म देखिएको छैन । तथापि अहिले सुरुको चरणमा भएकाले यसका लक्षण र असरबारे थाह पाउन केही समय भने लाग्ने छ ।

नेपाल आफैमा विश्वसँग व्यापार तथा अन्य हिसाबले व्यापकरुपमा संपर्कमा नरहे पनि विश्व उडानका हिसाबले नेपाल निकै संवेदनशील र महत्वपूर्ण ‘ट्रान्जिट प्वाइन्ट’ भने हो । यस अर्थमा पनि विश्वमा हुने कोभिडको उत्परिवर्तन नेपालमा आउन समय लाग्दैन । विश्वमा भएका विभिन्न उत्परिवर्तनले नेपाललाई अपवाद छाडेका छैनन् ।

त्यसैले नेपालभित्र भित्रिइसकेको ओमिक्रोनको संक्रामक फैलावटलाई रोक्न निकै सतर्कता जरुरी छ । यसका लागि हालसम्म अपनाइएका रोकथामका उपायहरुसहित अन्य वैज्ञानिक उपायहरुको अवलम्बन पनि जरुरी हुन आएको छ । स्वास्थ्य मन्त्रालय र सम्बन्धित निकाय तथा विषय विशेषज्ञ यसको समयमै रोकथामका लागि थप प्रभावकारी उपाय पत्ता लगाउन कत्ति पनि ढिलाइ नगरुन् ।