नेपाली श्रमिकको आकर्षक श्रमगन्तव्य कतार र नेपालका बीचमा हालसम्म काय रहँदै आएको श्रम–संझौतामाथि पुनरावलोकन गर्ने सहमती भएको छ । यसका लागि कतारको उच्चस्तरीय वार्ता टोली नेपालमा आएपछि दुवै देशका बीचमा उच्चस्तरीय वार्ता पनि सम्पन्न भैसकेको छ ।

वार्तामा नेपाल कतार मौजुदा श्रमसम्झौता पुनरावलोकन गर्न सहमत भएका छन् । तर यसका लागि दुवै देशहरुले केही गृहकार्य भने गर्न बाँकी छ । कतारले यसको बारेमा सरकारी निर्णय लिनु पर्ने छ भने नेपालले पनि यसका लागि सरकारी निर्णय लिनु पर्ने छ ।

श्रम सम्झौता पुनरावलोकनमा नेपालले कतारी रोजगारीका लागि चाहिने आवश्यक जनशक्ति निर्माण गर्न तालिम र प्रशिक्षणको व्यवस्था गरिनु पर्ने र त्यो पनि ७ वटै प्रदेशमा प्रदेश–स्तरीय कार्यालय खोलेर गरिनु पर्ने माग मुख्य रुपमा राखेको छ । यसका लागि कतारी उच्चस्तरीय वार्ता टोलीले सहमति जनाएको छ ।

अर्कोतिर कतारी वार्ता टोलीले नेपालले कतारमा घरेलु कामका लागि आफ्ना नागरिक नपठाउने भनी लगाएको प्रतिबन्ध फुकुवा गर्न माग गरेको छ । यो मागका सम्बन्धमा नेपाली वार्ता टोलीले सहमति जनाए पनि यसका बारेमा सम्बन्धित सबै पक्षसँग छलफल गरी सकारात्मक टुंगोमा पुग्ने संकेत दिएको छ ।

कतारको तर्फबाट प्राथमिकतामा रहेको यो विषयलाई बढी संभाव्य बनाउनका लागि उक्त उच्च स्तरीय टोलीले नेपालका श्रम, रोजगार तथा सामाजिक सुरक्षामन्त्री कृष्णकुमार श्रेष्ठसहित मन्त्रालयको टिमसँग पनि भेटघाट गरिसकेको छ । मन्त्री लगायतका मन्त्रालयको टिमले यसलाई सम्बन्धित सरोकारवाला निकायसँग आवश्यक छलफल गरी छिट्टै टुंगोमा पुग्ने आश्वासन दिएको छ ।

नेपालमा रोजगारका केही पनि कुराहरु हुन नसकेकाले नेपालीका लागि विदेशी श्रमगन्तव्य अनिवार्य नै हुन गएका छन् । तर पनि कुन श्रमरोजगार नेपालीका लागि बढी लाभदायी, बढी श्रेयस्कर र उचित हुन्छन्, त्यसका बारेमा सरकार र सम्बन्धित पक्ष निकै गम्भीर र सतर्क हुनुपर्छ ।

यस अर्थमा नेपालमा कतारका लागि आवश्यक जनशक्ति उत्पादनार्थ सञ्चालन गरिने प्रादेशिक तालिम केन्द्रहरु होऊन् वा कतारमा घरेलु श्रमिकका लागि पठाइने नेपाली माथिको प्रतिबन्ध फुकुवा होस्, सबै कुरालाई तात्कालिक तथा रणनीतिक आँखाले हेरियोस् । समग्रमा श्रमसंझौता पुनरावलोकन नेपाल र नेपालीका हितरक्षामा केन्द्रित होओस् ।