चितवन। नेकपा एमालेको १० औँ महाधिवेशनको उद्घाटनको दिन १० गते सार्वजनिक सवारी साधन सञ्चालनका लागि रोक लगाउने भएको छ ।
महाधिवेशन हुने स्थानमा पाँच लाख जनता उतार्ने एमालेको तयारी भएसँगै यसलाई व्यवस्थित बनाउन चितवन प्रशासनले विहान ९ बजेदेखि साँझ ५ बजेसम्म यातायात रोक लगाएको हो । पश्चिम नेपालबाट आउने र पश्चिम जाने अत्यावश्यक बाहेकका सवारी साधन पूर्ण रोक लगाइएको छ ।

पूर्वी नेपालबाट काठमाडांै र पोखरा आउजाउ गर्ने यातायात भने बाइपास सडकबाट सञ्चालनमा आउनेछ । भीडलाई व्यवस्थित पार्न र यातायात सहज बनाउन यस्तो निर्णय गरिएको प्रमुख जिल्ला अधिकारी असमान तामाङले जानकारी दिए ।

धेरै मानिसको आवागमन हुने भएकाले हामीले सवारी साधनलाई व्यवस्थित पार्नपर्छ उनले भने । नारायणी नदी पश्चिमबाट चितवन प्रवेशमा हामीले विहान ९ बजेदेखि पूर्ण रोक लगाएका छौ । काठमाडौँ र पोखराबाट नारायणगढ हुँदै पश्चिम जाने सावारी साधनपनि रोकिने छ । अत्यावश्यक एम्वुलेन्स, विरामी बोकेको साधन र सुरक्षा निकायका बाहेक यो मार्गमा सञ्चालन हुने छैन । बेलुका ५ बजेपछि भने सञ्चालन हुनेछ ।

पूर्वबाट आउने गाडीलाई भरतपुर केन्द्रीय बसपार्क क्षेत्रमा रोकिने छ भने पश्चिमबाट आउने गाडीलाई गैँडाकोटमै रोक्ने तयारी छ । मुग्लिन हुँदै काठमाडाैं, पोखराबाट आएका गाडी बजार भन्दा पर आँपटारीमा रोकिने छन् । यस्तै, पश्चिम चितवनबाट छुटेका गाडीलाई भरतपुरको त्रिचोक, बेलचोक र बाह्रघरे क्षेत्रमा रोकिने छ । महाधिवेशनका लागि पुगेका गाडी पनि त्यहीँ रोकिने छन् । महाधिवेशनका लागि सहभागीहरु दुईदेखि चार किलोमिटरसम्म हिँडेर उद्घाटनस्थल नारायणी किनार पुग्नुपर्ने हुन्छ । उद्घाटनस्थलसम्म जान नपाउनेका लागि ठाउँ–ठाउँमा डिजिटल डिस्प्ले बोर्ड राखिने छ ।

यस्तै, महाधिवेशनको उद्घाटनको दिन बजार क्षेत्रमा अत्यावश्यक सेवाका गाडी पनि सञ्चालन गर्न कठिनाई हुने अनुमान गरिएको छ । अत्यावश्यक सेवाका गाडीलाई कसरी पास गराउने भन्ने बारे छलफल भइरहेको जिल्ला प्रशासन कार्यालय चितवनले जनाएको छ ।