काठमाडौं । गृहमन्त्री बालकृष्ण खाँणले बाढीपहिरो प्रभावितलाई थप राहत प्रदान गर्नका लागि अनुगमन भइरहेको बताएका छन् ।

धनकुटा, पाँचथर र इलामको बाढीपहिरो प्रभावित क्षेत्रको आज अवलोकनपछि उनले थप राहत दिलाउन सरकार लागि परेको बताउदै राहत प्रदान गर्नका लागि अनुगमन भइरहेको जानकारी दिए ।

प्रधानमन्त्रीको कार्यभारसमेत सम्हालेका गृहमन्त्री खाँणले बाढीपहिराबाट मृत्यु भएका प्रतिपरिवारलाई रु दुई लाख, सोही घरका अन्य व्यक्तिको ज्यान गएको भए प्रतिव्यक्ति रु एक लाख राहत प्रदान गरिने निर्णय सरकारले गरिसकेको उल्लेख गर्दै यसमा के कति राहत थप गर्न सकिन्छ, त्यसका लागि प्रयास भइरहेको बताए । घाइतेको निःशुल्क उपचार र बेपत्ता परिवारलाई समेत रु दुई लाख दिने सरकारले यसअघि नै घोषणा गरिसकेको उनले बताए ।

गृहमन्त्री खाँणसँगै राष्ट्रिय योजना आयोगका उपाध्यक्ष, सडक विभागका प्रतिनिधिलगायतको टोलीले आज बढी प्रभावित क्षेत्रको निरीक्षण गरेका हुन् ।

गृहमन्त्री खाँणले बाढीपहिरा पीडितको उद्धार र राहतमा खट्ने सबैलाई धन्यवाद दिदैं अझै पनि केही व्यक्ति बेपत्ता रहेको हुँदा उनीहरुको उद्धार र राहतमा जुट्न सबैलाई आग्रह गरे ।

यसैगरी गृहमन्त्री खाँणले आजै धनकुटाको चौबिसे गाउँपालिका, पाँचथरको तुम्बेवा गाउँपालिकासहित इलाम र सुनसरी जिल्लामा पुगेर प्रभावित क्षेत्रका बासिन्दाको अवस्था बुझ्ने कार्यक्रम रहेको बताइएको छ ।