काठमाडौं । प्रधानन्यायाधीश चोलेन्द्रशम्शेर जबराले आइसोलेसन कक्षबाटै मुद्दाको पेशी तोकेका छन् ।

सोमबार कोरोना संक्रमित भएपछि सशस्त्र प्रहरी बलको अस्पतालमा भर्ना भएका प्रधानन्यायाधीश जबराले आइसोलेसन कक्षबाटै मंगलबार सर्वोच्च अदालतमा मुद्दाको पेशी तोके ।

मंगलबार सर्वोच्च अदालतमा प्रधानन्यायाधीशले मुद्दाको पेशी तोक्ने अन्तिम दिन थियो । किनभने बुधबारदेखि गोला प्रक्रियामा आधारित भई पेशी तोक्ने निर्णय भई त्यो सूचना राजपत्रमा प्रकाशित पनि भइसकेको छ ।

‘उहाँ संक्रमित भएको र आइसोलेसनमा रहनुभएको थाहा पाएपछि केही न्यायाधीशहरुले मुख्य रजिष्ट्रार लालबहादुर कुँवरसँग भेटेर कसरी पेशी तोक्नुभयो भनी जिज्ञासा राख्नुभएको थियो’ सर्वोच्च अदालत उच्च स्रोतले भन्यो, ‘मुख्य रजिष्ट्रारज्यूले सोमबार नै प्रधानन्यायाधीशज्यूले पेशी तोक्नुभएको हो भनी जवाफ दिनुभएछ ।’