काठमाडौँ । भनिन्छ, नि ‘प्रेम अन्धो हुन्छ’ । प्रेमको बारेमा दुनियाँमा अनेक कहानी रचिएका छन् । यसका लागि अनेक कृयाकलापहरु भएका छन् । माया र प्रेमका संकेतहरु दर्साउने मानिसहरुका विभिन्न तरिकाहरु हुने गर्दछन् । भारतको राजधानी शहर नयाँ दिल्ली नजिकै आग्रामा रहेको ताज महललाई आजसम्मको सबैभन्दा अजम्बरी मायाको चिनो अर्थात् प्रेमको प्रतिक मानिँदै आएको छ । ताजमहल अर्थात् प्रेमको उपहार वा प्रेमको प्रतिक ।

आग्रामा मुगल सम्राट शाहजहाँले आजभन्दा करिब ४ सय वर्ष पहिले आफ्नी श्रीमती मुमताजको सम्झनामा ताजमहल बनाएका थिए । त्यही ताज महललाई आधुनिक संसारमा प्रेमको स्मारक मानिन्छ । ती सम्राटकी रानीको उनको चौधौँ सन्तानलाई जन्म दिँदादिँदै ज्यान गएको थियो । सिङ्गमरमरले बनेको सो ताज महलको वास्तुकलाको आजको समयमा पनि विश्व भरि चर्चा हुने गरेको छ । संसारको प्रेमको प्रतिक मानिएको सो ताज महल हेर्न सामान्य अवस्थामा अहिले पनि दैनिक ७० हजार मानिस त्यहाँ पुग्ने गर्छन् ।

ती सम्राट रानीको प्रेममा कतिसम्म पागल थिए भने उनको मृत्युपछि उनको सम्झनामा ताजमहल बनाइसकेपछि त्यो बनाउने कालिगढले त्यस्तै भव्य र सुन्दर महल अन्त बनाउन नसकुन भनेर सम्राटले कालिगढका हात नै काटिदिएका थिए रे, भनेर समेत भन्ने गरिन्छ । अहिले सम्राट शाहजहाँले बनाएको सो ताज महल मानव निर्मित संसारको सातौँ आश्चर्यको रुपमा सुचिकृत छ ।

यो त भयो पहिलेको समयको कुरा । तर हाल पनि माया प्रेमको एउटा यस्तै घटना भएको छ । जहाँ भारत देशमै अर्को शहरमा एक शैक्षिक व्यापारीले आग्राको जस्तै देखिने अर्को ताज महल निर्माण गरेका छन् । उनले ताजमहल जस्तै देखिने एक भव्य भवन बनाएका मात्रै छैनन्, सो भवन आफ्नी श्रीमतीलाई उपहार स्वरुप प्रदान गरेका छन् ।

यसरी भारतमै नयाँ ताजमहल बनाउने व्यापारी हुन् भारतको मध्यप्रदेशका आनन्द प्रकाश चौकसे । व्यापारी  चौकसेले ताजमहल जस्तै अर्को भव्य महल भारतको मध्यप्रदेशस्थित बुरहानपुरमा निर्माण गरेका हुन् । हाल जीवनको ५२औं बसन्तमा हिंडिरहेका चौकसेले बुरहानपुरमा तीन वर्ष लगाएर नयाँ ताजमहल  निर्माण सम्पन्न गरेका हुन् ।

चौकसेले आफूले निर्माण गरेको नयाँ ताजमहल देखाउँदै भने, ‘यो मेरी श्रीमतीका लागि उपहार हो र यो उपहार यो शहरवासीका लागि पनि ।’ मध्यप्रदेशमै ताजमहल जस्तै देखिने नयाँ स्मारक बनेको खबरसँगै नयाँ ताजमहलको स्वरुप हेर्न मानिसहरु आउन थालेका छन् । नयाँ ताजमहल हेर्न आएका आगन्तुकहरुले त्यहाँ विहे हुनुभन्दा पहिले तस्विर खिच्ने गरेको चौकसेले जानकारी दिए ।

तस्विर खिच्न आउनेहरुलाई आफूले निर्माण गरेको घर खुल्ला राखेको बताउँदै चौकसेले भने, ‘म उनीहरुलाई रोक्दिन किन कि हाम्रो शहरमा हामी सबै मिलेर बसेका छौं । सबैले एक अर्कालाई चिन्छौं । त्यसैले मेरो घर हेर्न आउनेहरुका लागि सधैं खुल्ला छ ।’ तर सो भवन हेर्न आउने आगन्तुकहरु भवनभित्र जान भने पाउँदैनन् ।

सो भवनको दुई वटा तलामा एकएक वटा मुख्य सयन कक्ष रहेका छन् । चौकसेले सो घरमा एउटा पुस्तकालय र ध्यान गर्ने कक्ष पनि निर्माण गरेको बताए । भवनको बैठक कोठामा सिङ्गमरमर स्तम्भहरु, घुमेको भर्याङका साथै सुनको जलप लगाएका सिलिङ रहेका छन् । आफू धेरै पटक आग्राको ताज महल हेर्न गएको र त्यसैबाट प्रेरित भएर सो भवन बनाएको चौकसेले जानकारी दिए तर आफूले बनाएको सो नयाँ भवनमा स्लामिक संस्कृति र परम्पराको कुनै प्रभाव नदेखिने गरि भित्रि साजसज्जा गरेको चौकसे बताउँछन् ।

‘बरु यसमा अहिलेको समयको प्रभाव परेको छ’ चौकसेले भने । चौकसेले अगाडि भने,‘हामीले आफ्नै ताज महल बनाउन इन्टरनेटमा पाइने जति धेरै थ्रिडी तस्विरहरु प्रयोग गर्यौं । ‘निर्माण गर्दा त्यसका इञ्जिनियरहरुले ताजमहल जस्तै भवन बनाउने उद्धेश्य भएकोले सो नयाँ संरचनाको आकार आग्रामा रहेको ताज महल भन्दा एक तिहाइले घटाएका थिए ।

तर अहिले त्यस्तै भवन बनाएका आनन्द प्रकाश चौकसेले  फूले बनाएको सो नयाँ ताजमहल भने केवल आफ्नी श्रीमतीलाई मात्रै समर्पण नगरिएको भनेका छन् । भारतमा धर्म र जातका कारण विभाजित भएका मानिसहरुलाई सामाजिक झै झगडा र राजनीतिक कोलाहल भन्दा पर प्रेम र आपसी समझदारीको प्रतिक बनोस् भनेर यो घर निर्माण गरेको चौकसे बताउँछन् । उनले भनेका छन्,‘हाम्रो देशमा धेरै घृणा रहेको छ । मानिसहरु धर्म र जातका कारण विभाजित रहेका छन् । त्यसकारण मेरा लागि यो घर सामाजिक झैझगडा र राजनीतिक होहल्ला भन्दा पर रहेको प्रेमको एउटा प्रतिक हो ।’

भारतका प्रधानमन्त्री नरेन्द्र मोदीलाई हिन्दु राष्ट्रवादको पक्षपोषण गरेको आरोप लाग्ने गरेको छ । प्रधानमन्त्री मोदीका आलोचकहरुले उनको कारणले गर्दा भारतमा धार्मिक असहिष्णुता र ध्रुवीकरण बढेको भन्दै आलोचना गर्ने गर्छन् । भारतको ताजमहल बेला बेलामा धर्म सम्बन्धी विवादमा समेत पर्ने गरेको छ । सन् २०१७ मै पनि भारतमा भारतीय जनता पार्टीका एक सांसदले ताजमहललाई भारतीय संस्कृतिमा एउटा कलंक भनेका थिए । राज्य द्रोहीहरुले निर्माण गरेको भनेर ताजमहललाई ती सांसदले आरोप लागाएका थिए ।

अर्का मानिसले पनि बनाएका थिए ताजमहल

भारतमा शाहजहाँले बनाएको ताज महलबाट प्रेरित भएर ताज महल जस्तै नयाँ भवन बनाउने चौकसे भने पहिलो र एक्ला व्यक्ति भने होइनन् । यो भन्दा पहिले पनि भारतकै उत्तर प्रदेशमा अर्का एक व्यक्तिले यस्तै भवन निर्माण गरेका थिए । भारतको सरकारी सेवाबाट निवृत्त भएका एक मानिसले पनि सन् २०१३ मा उत्तर प्रदेशमै आफ्नी श्रीमतीको सम्झनामा ताजमहल जस्तै घर बनाएका थिए ।