गजल

आहा ! सम्झना मात्रैले पनि मन रङ्गीन भयो
निकै उपयोगी आजको मेरो यो दिन भयो ।

शाल्मली फूलजस्तै हजुरले मुस्कुराइदिनु
मेरोलागि साइत जुराउने लक्षिन भयो ।

खै कस्तो पो नशा थियो मिसाउनु भएको
मेरो सारा फुर्तीफार्ती एक्कासी मलिन भयो ।

बिरानो पनि म कति पो बिरानो भएछु
नचिन्ने जस्तो आजभोलि आफ्नै जमीन भयो ।

मर्दापर्दा चाहिने त छिमेकी नै हुन् भन्थे
हाम्रो त काम लाग्ने न भारत भयो, न चीन भयो ।

खगेन्द्र गिरी ‘कोपिला’
आदर्शमार्ग, नेपालगञ्ज–१