☰
काठमाडौं । चिनियाँ कम्युनिष्ट पार्टीले दक्षिण एशियाका कम्युनिष्ट पार्टीहरुसँग भर्चुअल रूपमा गरेको छलफल गरेको छ ।
चीनको अन्तर्राष्ट्रिय विभागले नेपालसहित दक्षिण एशियाली देशका वामपन्थी दलहरुसंग शासन अनुभवबारे छलफल गरेको जनाएको छ । छलफलमा नेपालका उपराष्ट्रपति नन्दबहादुर पुन पासाङ पनि सहभागी थिए । माओवादी अध्यक्ष प्रचण्ड, नेकपा एसका अध्यक्ष माधवकुमार नेपाल, नेपाल कम्युनिस्ट पार्टीका महासचिव नेत्रविक्रम चन्द विप्लव पनि सहभागी थिए ।
चिनियाँ कम्युनिष्ट पार्टी केन्द्रीय समितिको अन्तर्राष्ट्रिय विभागले १९औँ चिनियाँ कम्युनिष्ट केन्द्रीय समितिको छैटौं पूर्ण सत्र र चिनियाँ कम्युनिष्ट पार्टी र दक्षिण एसियाली देशका वामपन्थी दलहरूबीचको शासन अनुभवसम्बन्धी गोष्ठीबारे विषयगत ब्रिफिङ आयोजना गरेको थियो ।
भर्चुअल गोष्ठिमा नेपालका उपराष्ट्रपति नन्दबहादुर पुन, श्रीलंकाका सभामुख महिन्दा यापा अबेवर्देना, भारतीय कम्युनिष्ट पार्टी (मार्क्सवादी) का महासचिव सीताराम येचुरी, बंगलादेशको कम्युनिष्ट पार्टी (मार्क्सवादी–लेनिनवादी)का महासचिव दिलीप बरुवा, महाजन एकताका नेता पेरामुना र सदनका नेता एवम सांसद सहभागी थिए । यस्तै, श्रीलंकाका शिक्षामन्त्री दिनेश गुणवर्द्धना, नेपाल कम्युनिष्ट पार्टी (माओवादी केन्द्र) का अध्यक्ष एवं नेपालका पूर्वप्रधानमन्त्री पुष्पकमल दाहाल (प्रचण्ड), नेपाल कम्युनिष्ट पार्टी (एकीकृत समाजवादी) का अध्यक्ष तथा पूर्वप्रधानमन्त्री माधव कुमार नेपाल, बंगलादेश कम्युनिष्ट पार्टीका महासचिव मो. शाह आलम, कम्युनिष्ट पार्टी श्रीलंकाका महासचिव डा. जी. वीरासिङ्घेलगायतको उपस्थिति थियो ।
सम्मेलनमा दक्षिण एसियाका करिब २० वामपन्थी राजनीतिक दलका नेताहरू, क्षेत्रीय तथा अन्तर्राष्ट्रिय वामपन्थी संगठनका प्रतिनिधिहरू र मिडिया थिंक ट्याङ्कहरूसहित करिब ३०० व्यक्ति सहभागी थिए ।
