काठमाडौं । मुटुरोग विशेषज्ञहरुले नेपालमा हृदयाघात भई अस्पताल पुग्ने युवाको संख्या पछिल्ला वर्षमा बढ्दै गएको बताएका छन् । सहिद गंगालाल हृदय केन्द्रमा हृदयाघात भएर पुग्ने युवा तुलनात्मक रुपमा २४ वर्षदेखि ४५ वर्ष उमेरसम्मका धेरै रहेको केन्द्रका निर्देशक डा. अधिकारीको अनुभव छ ।

‘अस्पतालमा दैनिकजसो युवा हृदयाघात भएर आइरहेका हुन्छन्, कतिपय २४–२५ वर्षका पनि छन्’, उनले भने ।

सन् २०१८ मा केन्द्रमा भएको अध्ययन अनुसार हृदयाघात भएर भर्ना भएकामध्ये १२ प्रतिशत ४५ वर्ष उमेरमुनिका युवा थिए । तीमध्ये २ दशमलब २ प्रतिशत ३५ वर्षमुनिका थिए । सन् २०१५ मा हृदयाघात भएका २४ देखि ४५ वर्ष उमेरभित्रका युवाको संख्या १०.९ प्रतिशत थियो ।

अध्ययनले हृदयाघातबाट पीडितमध्ये ५४ प्रतिशत धूमपानका अम्मली, ३६.६ प्रतिशत उच्च रक्तचापका रोगी, २५.३ प्रतिशत मधुमेहका रोगी, ७.८ प्रतिशत कार्डिसियल र डाइस्लिपिडेमिया भएका थिए ।

अध्ययनले हृदयाघात भएका मध्येमा ३९ प्रतिशत धूमपान गरिरहेका, ४३.६ प्रतिशत धूमपान नगरेका र १४.८ प्रतिशत पहिला धूमपान गरेर छाडेका देखाएको छ । आजको नागरिक दैनिकमा समाचार छ ।