काठमाडौं । नेकपा एमालेका अध्यक्ष केपी शर्मा ओलीले संसदले काम गर्न नसक्ने भएपछि आफूले दुई पटक गरेको विघटन ठिक रहेको भन्दै बचाउ गरेका छन् ।

ललितपुरस्थित तुलसीलाल स्मृति प्रष्ठिानमा केन्द्रीय कमिटीको बैठकमा राजनीतिक प्रतिवेदनमाथि उठेका प्रश्नको जवाफ दिँदै उनले संसद विघटनको बचाउ गरेका हुन् ।

ओलीले संसदले काम गर्न नसक्ने भएपछि विघटन गरेको भन्दै चुनावमा जाने कुरा कहिल्यै गलत नहुने बताएका छन् । शनिबार बसेको बैठकमा केही केन्द्रीय सदस्यहरुले संसद् विघटन गलत रहेको टिप्पणी गरेका थिए । आइतबार सोही विषयमा जवाफ दिँदै ओलीले संसदले काम नगर्न नसकेकाले ताजा जनादेशमा जाने निर्णय गरिएको भन्दै अहिले पनि संसदले काम गर्न नसकेकाले आफूले गरेको निर्णय ठिक रहेको जिकिर गरेका थिए ।

बैठकलाई सम्बोधन गर्दै अध्यक्ष ओलीले एमालेलाई चुनावमा जान कुनै समस्या नरहेको बताएका छन् । उनले आफ्नो सरकारले अरुले पनि सिक्नुपर्ने काम गरेको दाबी गर्दै यत्रो काम गरेको पार्टीलाई चुनावमा जान कुनै समस्या नहुने बताए । उनले आफ्नै पार्टीका केही नेताहरुको कारण सरकारबाट हट्नुपरे पनि खासै क्षति नभएको उल्लेख गर्दै सम्हालिएर अगाडि बढ्ने बताए । उनले चुनावलाई केन्द्रमा राखेर काम गर्न पनि निर्देशन दिए ।

अध्यक्ष ओलीले केही पनि काम नगरेकाहरु त चुनावमा जान खोजी रहेको भन्दै एमाले काम गरेको पार्टी भएको उल्लेख गरे ।