काठमाडौँ। नेकपा (एमाले)का अध्यक्ष केपी शर्मा ओलीले आफ्नो नेतृत्वको सरकारको पालामा असाधारण काम भएकोले जनतामा कसरी भोट माग्न जाने होला भन्ने स्थिति नरहेको बताएका छन् । ललितपुरको च्यासलमा बसेको केन्द्रीय कमिटी बैठकमा राजनीतिक र संगठनात्मक प्रतिवेदनमाथि उठेका प्रश्नको आइतवार जवाफ दिँदै ओलीले देश विकासको भिजन दिएकोले जनतामा जानका लागि प्रशस्त आधार रहेको बताए । एमालेसँग विचार र भिजनको कमी नभएको उनको भनाइ थियो ।

‘जनताकोमा कसरी भोट माग्न जाने होला भन्ने स्थिति छैन । केही काम नगरेका र खराब गरेकाहरू त चुनावमा जाने भन्दैछन्,’ ओलीले भने, ‘जनताको पक्षमा असाधारण काम भएका छन् । यो कुराको झलक राजनीतिक प्रतिवेदनमा छ ।’

ओलीले सरकारमा छँदा असाधारण काम गरेको र देश विकासको भिजन दिएको दाबी गरे । ‘हामीसँग भिजन छ, नेपालमा पहिलो पटक विकासको व्यापक चर्चा गर्ने काम हामीले गरेका छौं । राष्ट्रियतासम्बन्धी भिजन छ, लोकतन्त्रको उन्नत भिजन छ । हामीसँग भिजन र दृष्टिकोण छ,’ उनले भने।