☰
काठमाडौँ । नेपाल प्रहरीको राष्ट्रिय प्रहरी प्रशिक्षण प्रतिष्ठान महाराजगञ्जका साथै विभिन्न प्रदेश प्रहरी तालिम केन्द्र तथा गणहरुबाट नेपाल प्रहरीको आधारभूत तालिम सफलतापूर्वक सम्पन्न गरेर ३ हजार ५ सय ७१ जना प्रहरी जवान दीक्षित भएका छन् । नेपाल प्रहरीको ती तालिम केन्द्र तथा गणहरुमा २०७७ मंसिर ३ गतेदेखि सञ्चालित प्रहरी जवान आधारभूत तालिममा सहभागी ३ हजार ५ सय ७१ जना प्रहरी जवानहरु मंगलबार दीक्षित भएका हुन् । आधारभूत तालिम सम्पन्न गरेर दीक्षित हुनेहरुमध्ये ६ सय ५८ जना महिला र २ हजार ९ सय १३ जना पुरुष रहेका छन् ।
केन्द्रीय प्रहरी विशेष कार्यदल कपनको दीक्षान्त समारोहमा महानगरीय प्रहरी कार्यालय रानीपोखरीका प्रहरी नायव महानिरीक्षक उत्तम राज सुवेदीले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । दीक्षान्त समारोहमा सशस्त्र प्रहरी गण नम्बर १ नक्सालका ९४ जना र केन्द्रीय प्रहरी विशेष कार्यदल कपनका ९६ जना गरी जम्मा १ सय ९० जना प्रशिक्षार्थी दीक्षित भएका छन् ।
नेपाल प्रहरी शिक्षालय भरतपुरको दीक्षान्त समारोहमा प्रहरी प्रधान कार्यालय, प्रहरी महानिरीक्षकको सचिवालय नक्सालका प्रहरी नायव महानिरीक्षक बसन्त कुमार लामाले प्रशिक्षार्थीहरुलाई पुरस्कार तथा प्रमाणपत्र वितरण गरे । उक्त शिक्षालयबाट ८८ जना प्रशिक्षार्थीहरु दीक्षित भएका छन् ।
प्रहरी युक्ति तालिम महाविद्यालय जर्गाह नवलपरासीको दीक्षान्त समारोहमा राष्टिय प्रहरी प्रशिक्षण प्रतिष्ठान महाराजगञ्जका प्रहरी नायव महानिरीक्षक डा. देवबहादुर बोहराले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त महाविद्यालयबाट १ सय ६० जना प्रशिक्षार्थीहरु दीक्षित भएका छन् ।
त्यस्तै १ नम्बर प्रदेश प्रहरी तालिम केन्द्र रानी विराटनगरको दीक्षान्त समारोहमा १ नम्बर प्रदेश प्रहरी कार्यालय विराटनगरका प्रमुख प्रहरी नायव महानिरीक्षक अरुणकुमार बिसीले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त दीक्षान्त समारोहमा १ नम्बर प्रदेश प्रहरी तालिम केन्द्र रानी विराटनगरका ४ सय ८० जना, १ नम्बर प्रदेश सशस्त्र प्रहरी गण विराटनगरका ९६ जना र दंगा नियन्त्रण प्रहरी गण दुहवीका ९५ जना गरी जम्मा ६ सय ७१ जना प्रशिक्षार्थीहरु दीक्षित भएका छन् ।
त्यस्तै २ नम्बर प्रदेश प्रहरी तालिम केन्द्र जनकपुर राजविराजको दीक्षान्त समारोहमा २ नम्बर प्रदेश प्रहरी कार्यालय जनकपुरका प्रमुख प्रहरी नायव महानिरीक्षक उमेश रंजितकारले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त तालिम केन्द्रबाट १ सय ९४ जना प्रशिक्षार्थीहरु दीक्षित भएका छन् ।
बागमती प्रदेश प्रहरी तालिम केन्द्र दुधौली सिन्धुलीको दीक्षान्त समारोहमा बागमती प्रदेश प्रहरी कार्यालय हेटौंडाका प्रमुख प्रहरी नायव महानिरीक्षक प्रकाशजंग कार्कीले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त तालिम केन्द्रबाट २ सय २ जना प्रशिक्षार्थीहरु दीक्षित भएका छन् । साथै बागमती प्रदेश दंगा नियन्त्रण प्रहरी गण हेटौंडाको दीक्षान्त समारोहमा संघीय प्रहरी ईकाइ कार्यालय बागमतीका प्रमुख प्रहरी वरिष्ठ उपरीक्षक श्यामलाल ज्ञवालीले प्रशिक्षार्थीहरूलाई पुरस्कार तथा प्रमाणपत्र वितरण गरेका थिए । संयुक्त रुपमा आयोजित उक्त कार्यक्रममा सोही गणबाट ४८ जना र बागमती प्रदेश सशस्त्र प्रहरी गण रातोमाटेबाट ४७ जना प्रशिक्षार्थीहरु दीक्षित भएका छन् ।
गण्डकी प्रदेश प्रहरी तालिम केन्द्र पोखराको दीक्षान्त समारोहमा गण्डकी प्रदेश प्रहरी कार्यालय पोखराका प्रमुख प्रहरी नायव महानिरीक्षक दिवस लोहनीले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त तालिम केन्द्रबाट २ सय १० जना प्रशिक्षार्थीहरु दीक्षित भएका छन् ।
लुम्बिनी प्रदेश प्रहरी तालिम केन्द्र बुटवलको दीक्षान्त समारोहमा लुम्बिनी प्रदेश प्रहरी कार्यालय दाङका प्रमुख प्रहरी नायव महानिरीक्षक मुकुन्दराज आचार्यले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त तालिम केन्द्रबाट ३ सय ९६ जना प्रशिक्षार्थीहरु दीक्षित भएका छन् । साथै लुम्बिनी प्रदेश दंगा नियन्त्रण प्रहरी गण सुनवल नवलपरासीको दीक्षान्त समारोहमा संघीय प्रहरी ईकाई कार्यालय रुपन्देहीका प्रमुख प्रहरी वरिष्ठ उपरीक्षक सुशिलकुमार यादवले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त गणबाट ९७ जना प्रशिक्षार्थीहरु दीक्षित भएका छन् ।
कर्णाली प्रदेश प्रहरी तालिम केन्द्र सुर्खेत (हाल नेपालगंज)को दीक्षान्त समारोहमा कर्णाली प्रदेश प्रहरी कार्यालय सुर्खेतका प्रमुख प्रहरी नायव महानिरीक्षक गणेशबहादुर ऐरले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त तालिम केन्द्रबाट ५ सय १२ जना प्रशिक्षार्थीहरु दीक्षित भएका छन् । साथै कर्णाली प्रदेश सशस्त्र प्रहरी गण सुर्खेतबाट ९८ जना प्रशिक्षार्थीहरु दीक्षित भएका छन् ।
सुदूरपश्चिम प्रदेश प्रहरी तालिम केन्द्र दिपायलको दीक्षान्त समारोहमा प्रहरी प्रधान कार्यालय अपराध अनुसन्धान विभाग नक्सालका प्रहरी नायव महानिरीक्षक राजेश कुमारलाल कर्णले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त तालिम केन्द्रबाट ३ सय ९५ जना प्रशिक्षार्थीहरु दीक्षित भएका छन् । साथै सुदूरपश्चिम प्रदेश तालिम केन्द्र दिपायल अन्तर्गत बुडरको दिक्षान्त समारोहमा सुदूरपश्चिम प्रदेश प्रहरी कार्यालय धनगढीका प्रहरी वरिष्ठ उपरीक्षक विक्रमबहादुर चन्दले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त प्रशिक्षणस्थलबाट २ सय ११ जना प्रशिक्षार्थिहरु दीक्षित भए ।
राष्ट्रिय प्रहरी प्रक्षिक्षण प्रतिष्ठान महाराजगञ्जको दीक्षान्त समारोहमा नेपाल प्रहरी अपराध अनुसन्धान विद्यालयका प्रधानाचार्य प्रहरी वरिष्ठ उपरीक्षक रविन्द्र केसीले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त प्रतिष्ठानबाट ५२ जना प्रशिक्षार्थीहरु दीक्षित भएका छन् । दीक्षान्त समारोहका प्रमुख अतिथिहरुले प्रहरी जवान आधारभूत तालिम सफलतापूर्वक सम्पन्न गरेका प्रशिक्षार्थीहरुलाई बधाई तथा सफलताको कामना व्यक्त गर्दै आवश्यक निर्देशनसमेत दिएका थिए ।
