☰
काठमाडौँ । एकै घरकी, एउटै बाबु र आमाकी छोरीहरु एकैदिन मात्रै होइन एक मिनेटमै जन्मिएका तीन दिदी–बहिनी । अर्थात् तीम्ल्याहा दिदी–बहिनीहरु जसले यस पटकको कक्षा १० को वार्षिक परिक्षा एसईई पनि एकैचोटी पास गरेका छन् । यो कुराले धेरैमा एकखाले उत्प्रेरणा पैदा गरायो । जन्मदै एउटै गर्भबाट एकैचोटी जन्मिएका तीन दिदी–बहिनीहरु लवीका खातुन, अतिका खातुन र सबिका खातुनसँगै पढ्ने मात्रै होइन उनीहरु पढाईमा पनि अब्बल रहेका छन् । जसले २०७७ सालको एसईई परिक्षा एकैसाथ ए प्लस अंक ल्याएर पास गरेका हुन् ।
परिक्षा हलमै जन्मिएका दिदी–बहिनीहरु
एसईई परिक्षामा एकदम राम्रो अंक ल्याएर पास गरेका तीनजना खातुन दिदी–बहिनी २०६२ साल चैत १६ गते तत्कालिन एसएलसी परिक्षा हलमै जन्मिएका थिए । उनीहरूकी आमा सबिला खातुन त्यतिबेला अर्थात् २०६२ सालमा उनीहरुलाई आफ्नो गर्भमा बोकेर आफ्नो एसएलसी परिक्षाको लागि तेस्रो दिनको परिक्षामा सामेल भइरहेकी थिइन् । उतिबेलै सबिलालाई सुत्केरी व्यथाले च्याप्यो । सबिला छट्पटिन थालिन । पर्सा जिल्ला बिन्दवासीनी गाउँपालिका वडानम्बर ५ साबिक पर्सौनीभाटा गाविसकी सबिला आफ्ना श्रीमान भारतको पञ्जाबमा अध्ययनको लागि गएको समयमा पनि गर्भमा तीनजना छोरीहरु बोकेर घर व्यवहारसँगै आफ्नो पढाईलाई निरन्तरता दिइरहिन् ।
एसएलसी परिक्षा हलमा सुत्केरी व्यथाले उनलाई च्यापेपछि साथीसंगी तथा आफन्तको सहयोगमा उनलाई अस्पताल पुर्याइयो । परिक्षा दिन बिहान घरबाट कापी र कलम बोकेर विद्यालय पुगेकी सबिला बेलुका घर आउने बेला तीनजना छोरीहरु एकैचोटी जन्माएर आइन् । पर्सौनीभाटा गाबिसभरी तीन छोरीहरु एकैपटक जन्मिएको खबर सनसनी फैलियो । तीनछोरीलाई एकैचोटी जन्माउने सबिलाको औपचारिक पढाईले तीनछोरी पाएको दिनदेखि विश्राम लियो । अब एकैचोटी जन्मिएका तीनछोरीलाई सकुशल हुर्काउनु नै उनको जीवनको लक्ष्य बनेर अगाडी आयो ।
जन्मदै संघर्ष गरेका दिदी–बहिनीहरुः
एउटै गर्भमा एउटै मानिस अर्थात् बच्चालाई त कसरी गुटुलमुटुल भएर बस्नु परेको हुन्छ भने तीनजना मानिस एउटै गर्भमा बस्दा कति गुटुलमुटुल भएर बस्नु पर्यो होला ? एउटा सानो गर्भमा तीन तीनजना बसेर ९ महिनासम्म हुर्कंदा उनीहरु बीचमा कति धकेलाधकेल र ठेलठेला भयो होला ? हामी केवल कल्पना मात्र गर्न सक्छौं । न त ती दिदी–बहिनीहरु नै गर्भमा रहँदा भएको आफ्नो अफ्ठेरोको अनुभव अहिले हामीलाई बताउन सक्छन् । तीनजनाले एउटै आमाका दुइवटा दुध चुस्दा पनि पक्कै सहज भएन नै ।
एउटा महिलाको छातीमा प्रकृतिले दुइवटा स्तन बनाएको हुन्छ भने त्यही प्रकृतिले सबिला खातुन र उनका श्रीमान समिन अहमदलाई एकैचोटी तीनवटा छोरीहरु उपहार दिएको थियो । मुस्लिम धर्म अबलम्बन गर्ने समिन र सबिला दम्पती यस्तो कुरालाई ‘अल्लाहको देन’ ठान्छन् । जसरी होस् र जे होस् जन्मनु के थियो र ? तिम्ल्याहा दिदी–बहिनीको संघर्षको समय सुरु भएको थियो । एउटा आमाको काखमा तीनजना बालिका हुर्काउनै धौ । दुइटा स्तन तीनजनालाई एकैसाथ कसरी चुसाउने ? दुध चुस्नलाई तीनजनासँगै रुन थाल्ने ।
दम्पतीले जसरी तसरी तीन बहिनीलाई हुर्काए । आमाको बाहेक गाई–भैंसीको दुध खुवाएर पनि छोरीहरुलाई हुर्काए, बचाए र ठूलो बनाए । उनीहरु जन्मेको १ वर्षपछि तीनबहिनीलाई लिएर समिन अहमद आफ्नी श्रीमती सहित आफूले पढिरहेको ठाउँ भारतको पञ्जाब गए । दुइवर्ष उनीहरु उतै बसे । दुइवर्षपछि आफ्नै थलोमा आएर छोरीहरुको शिक्षाको लागि पर्सानीभाटामा मुस्लिम संगठन अहमदीया संघ नेपालले सञ्चालन गरेको विद्यालय मसरुर पब्लिक स्कूलमा छोरीहरुलाई भर्ना गरे । अब तिम्ल्याहा दिदी–बहिनीको औपचारिक शिक्षा सुरु भयो ।
पढाईमा सधैं अब्बल तीन–बहिनी:
मसरुर पब्लिक स्कूलमा कक्षा ४ सम्म उनीहरुले पढे । उता उनीहरुका बुवा समिन अहमदले आफ्नो पढाईपछि मुस्लिम संगठन अहमदीया संघ नेपालमा जागिर सुरु गरे । ४ कक्षासम्म छोरीहरुलाई मसरुर पब्लिक स्कूलमा पढाएपछि समिनले उनीहरुलाई काठमाडौँ ल्याए । काठमाडौँमा गुह्यस्वरी माध्यमिक विद्यालयमा भर्ना गर्न खोज्दा सो विद्यालयले छोरीहरुलाई २ कक्षामा मात्रै भर्ना गर्यो । पर्सामा ४ कक्षा पढेका नानीहरु काठमाडौँ आउँदा २ मा भर्ना गरे ।
४ पढेर आउँदा पनि काठमाडौँको विद्यालयले नपत्याएर २ मा भर्ना गर्दा छोरीहरुलाई झन् राम्रो गरेर देखाउने चुनौती आइलाग्यो । नभन्दै काठमाडौँमा भर्ना भएको पहिलो वर्षमा नै तीनजना छोरीहरु नै कक्षाको वार्षिक परिक्षामा पहिलो, दोस्रो र तेस्रो भएर देखाए । अहमदीया संघले समिनलाई इटहरी हेर्ने जिम्मा दियो । जता अभिभावकको जागिर हुन्छ उतै जानु पर्ने बाध्यता नानीहरुमा थियो । समिनले छोरीहरुलाई इटहरी लिए । कक्षा ५ देखि ८ सम्म खातुन दिदी–बहिनीहरुले इटहरीमै शिक्षा लिए ।
समिनलाई अहमदीया संघले राजधानी उपत्यका हेर्ने जिम्मा दिएर काठमाडौँ बोलायो उनी यतै आए । छोरीहरुलाई पनि कक्षा ९ र १० मा राजधानीको शिवपुरी माध्यमिक विद्यालयमा भर्ना गरे । तीन दिदी–बहिनीहरु हुने कक्षामा अरुको पालो चौथो हुने मात्रै हुन्थ्यो किनकि पहिलो, दोस्रो र तेस्रो त उनी दिदी–बहिनीहरु नै पालैपालो हुन्थे । दिदी–बहिनीहरुमा आफैमा पनि कडा प्ररिस्पर्धा रहेको छ । पहिलो दोस्रो र तेस्रो हुन लगातार कुनैले पनि पाएका छैनन् । किनकि उनीहरुमध्ये एक वर्ष एउटा प्रथम भयो भने त्यसलाई अर्को वर्ष अर्कोले जितिहाल्ने गरेको देखिन्छ । गर्दै जाँदा कक्षा १० को वार्षिक परिक्षा एसईईमा तीनैजना दिदी–बहिनीको समान अंक जिपिए ३.९५ आएको छ । कस्तो संयोग ! सँगै जन्मिएका दिदी–बहिनीहरुको परिक्षामा पनि उस्तै बराबर नम्बर त्यो पनि शतप्रतिशतको नजिक ।
तीन दिदीबहिनीको समान लक्ष्यः
बराबर अंक ल्याएर एसईई पास गरेका खातुन दिदी–बहिनीहरुको जीवनको लक्ष्यपनि समान रहेको छ । कक्षा ११ र १२ मा विज्ञान विषय पढेर भविष्यमा चिकित्सक हुने उनीहरुको लक्ष्य रहेको छ । पहाडको दुर्गम गाउँ पुरै रुपमा देख्न नपाए पनि तराईको दुर्गम गाउँमा एकैसाथ जन्मिएका तीन दिदी–बहिनी भन्छन्, ‘शरीर फरक भएपनि हाम्रो सोचाई, भोगाई र भविष्यप्रतिको आशा एउटै रहेको छ।’ जे सोच्छन्, उनीहरु एउटै सोच्दा रहेछन् । त्यही भएर होला सायद भविष्यमा के बन्ने भनेर सोध्दा तीनैजनाले एकै स्वरमा भन्छन्, ‘चिकित्सक बन्ने ।’
नेपालका प्रख्यात आँखा चिकित्सक डा.सन्दुक रुइतबाट प्रभावित उनीहरु पनि भविष्यमा डा.रुइत जस्तै बनेर देशको सेवा गर्न चाहन्छन् । खासगरी तराईका दुर्गम गाउँहरुमा अहिलेपनि मानिसहरुले आधारभूत स्वास्थ्य सेवा नपाएको देखेर उनीहरुको मन कटकटी खाइरहेको छ । जतिसक्दो तराईका दुर्गम गाउँमा चिकित्सक बनेर गई गाउँलेलाई सेवा गर्ने उनीहरुको सपना र धोको पुरा होओस् शुभकामना !
