काठमाडौं । पछिल्लो समय राजनीति भेटवार्तालाई तीव्रता दिदै आएका नेपाल कम्युनिष्ट पार्टी नेकपाका महासचिव नेत्रविक्रम चन्द ‘विप्लव’ र नेकपा (क्रान्तिकारी माओवादी)का महासचिव मोहन वैद्य ‘किरण’बीच भेटवार्ता भएको छ ।

चन्दले शनिबार वैद्यसँग भेटवार्ता गरेका हुन् । दुई नेताबीचको भेटमा समसामयिक विषयमा छलफल भएको चन्द निकट नेताहरुले बताएका छन् । भित्री कुराकानी नखुलाएपनि माओवादी ध्रुवीकरणका विषयमा छलफल भएको नेताहरुको भनाइ छ ।

यसअघि उनले माओवादी केन्द्रका अध्यक्ष पुष्पकमल दाहाल प्रचण्ड, पूर्व माओवादी नेता एवं हाल जसपाका केन्द्रीय परिषद अध्यक्ष डा बाबुराम भट्टराई र एमाले वरिष्ठ नेता माधवकुमार नेपालसँग पनि भेटवार्ता गरेका थिए ।

केपी ओली सरकारसँग भएको सहमति पूर्ण रुपमा कार्यान्वयन नभएपछि नयाँ सरकार गठन भएलगत्तै महासचिव चन्दको दौडधुप बढेको छ । ओली सरकारसँग तीन बुँदे सहमति गर्दै शान्ति प्रक्रियामा आउने सम्झौता गरेको चन्द समूहले पक्राउ परेका आफ्ना नेता तथा कार्यकर्ताको रिहाईको माग गर्दै आएको छ ।