काठमाडौँ। चीनको एउटा मार्सल आर्ट विद्यालयमा आगालागी हुँदा कम्तिमा १८ जनाको मृत्यु भएको छ भने १६ जना घाइते भएका छन्। चीनको खनान प्रान्तको झङसिङ मार्सल आर्ट सेन्टरमा आगलागी भएर सो सेन्टरमा रहेका आवासीय विद्यार्थीहरु मध्ये १८ जनाको मृत्यु भएको विभिन्न संचार माध्यमले जनाएका छन्।

सो आगलागीमा परेर मृत्युहुनेमध्य अधिकांश ७ देखि १६ वर्षका बालबालिका भएको बताइएको छ। शुक्रबार एकाबिहानै भएको आगलागी अहिले भने नियन्त्रणमा आइसकेको छ। आगलागी नियन्त्रणमा आएपनि के कारणले आगलागी भएको अझैं खुल्न सकेको भने छैन।

झङसिङ काउन्टी सरकारले आफ्नो आधिकारिक तरिकाले दिएको जानकारी अनुसार आगलागी भएको मार्सल आर्ट सेन्टरका एक अधिकारीलाई पक्राउ गरिएको बताएको छ।

सरकारी अधिकारीहरूले बीइङ्ग टोउटीआओ न्यूजलाई बताए अनुसार शुक्रवार बिहान ३ बजे आगलागी हुँदा आवासीय विद्यालयमा ३४ जना विद्यार्थीहरु थिए।

घाइते विद्यार्थीहरूलाई तत्काल अस्पताल पुर्याइएको थियो। रोयटर्स समाचार संस्थाले कुराकानी गरेको अभिभावकहरूले उनीहरूलाई आफ्ना बच्चाबारे कुनै जानकारी नदिइएको र बच्चालाई हेर्न पनि नदिइएको बताएका छन्।