काठमाडौँ। अब सुरु हुन लागेको शैक्षिक सत्र २०७८ को लागि पाठ्यपुस्तकको अभाव नहुने जनक शिक्षा सामग्री केन्द्र लिमिटेडले बताएको छ। जनक शिक्षाका प्रमूख अनिल कुमार झाका अनुसार यसवर्ष कक्षा ४ देखि १० सम्मका चाहिने जति पाठ्यपुस्तक छपाई सकी तयार भएर जनक शिक्षा सामग्री केन्द्र लिमिटेडका प्रादेशिक कार्यालयहरुमा पुगिसकेका छन्।

कोरोना महामारीको निषेधाज्ञाले गर्दा वितरक तथा बिक्रेताहरू प्रादेशिक कार्यालयसम्म आएर विद्यालयमा पुस्तक पुग्न केही समस्या भएपनि जेठ मसान्तसम्म पुस्तक विद्यालयमा पुगेर असार पहिलो हप्तामा पाठ्यपुस्तक विद्यार्थीको हातमा पुगिसक्ने प्रमूख झाले विश्वास व्यक्त गरे।

केन्द्रका प्रादेशिक कार्यालयहरु विराटनगर, जनकपुर, भरतपुर,केन्द्रिय कार्यालय सानोठिमी भक्तपुर, बुटवल, पोखरा, नेपालगंज, सुर्खेत र  धनगढी लगायतका स्थानहरुमा पाठ्यपुस्तक पुगिसकेको उल्लेख गर्दै प्रमूख झाले अलिकति सहज अवस्था हुने बित्तिकै देशभरका केन्द्रमा सुचिकृत १२ सय पुस्तक बिक्रेताहरुले पुस्तक विद्यालयमा पुर्याउने बताए।

प्रमूख झाका अनुसार पुस्तक छपाई र उत्पादनमा कुनै समस्या नभएकोले यो वर्षको शैक्षिक सत्रलाई चाहिने सम्पूर्ण पुस्तक उत्पादन भइसकेको छ। गत शैक्षिक सत्रमा कक्षा ४ देखि १० सम्मको लागि १ करोड ६२ लाख पाठ्यपुस्तक छपाई भएकोमा यो वर्ष भने १ करोड ७० लाख पाठ्यपुस्तक छपाई भएर प्रादेशिक कार्यालयहरुमा पुगिसकेको जनक शिक्षाको दावि रहेको छ।