काठमाडौँ /

नेपाल शिक्षक महासंघले आफ्नो दोस्रो चरणको आन्दोलनको कार्यक्रम घोषणा गरेको छ। जेठ ५ गतेबाट दोस्रो चरणका आन्दोलनका कार्यक्रम शुरु गरिने महासंघले जनाएको छ।

महासंघले आन्दोलन भनेर तालिकावद्ध रुपमा सार्वजनिक गरेका कार्यक्रमहरुमा जेठ ५ गतेदेखि महासंघले अघि सारेका माग तथा समसामयिक बिषयमा प्रधानमन्त्री,सभामुख,शिक्षा विज्ञान तथा प्रविधीमन्त्री र अर्थमन्त्रीको धानाकर्षणको लागि खुला पत्र बुझाउने। सो खुलापत्र हरेक शिक्षक कर्मचारीले आफ्नो फेसबूक वालबाट शेयर गर्ने महासंघले बताएको छ। आन्दोलनका कार्यक्रम अन्तर्गत महासंघले जेठ ७ गते हरेक शिक्षक तथा कर्मचारीले शिक्षा, विज्ञान तथा प्रविधीमन्त्री र अर्थमन्त्रीको मोबाइलमा ‘शिक्षक तथा विद्यालय कर्मचारीलाई अबिलम्ब कोभिड बिरुद्धको खोप दिइयोस,बाल कक्षाका शिक्षक र कर्मचारीको तलब वृद्धी गरियोस’ भन्ने नारा टेक्स्ट म्यासेज गरेर पठाउने।

त्यस्तै जेठ ९ गते संसदमा प्रतिनिधित्व गर्ने राजनैतिक पार्टीका सचेतक तथा माहासंघबीच महासंघमा पेश भएका माग र समसामयिक बिषयमा अनलाइन अन्तरकृया तथा छलफल गर्ने।

सार्वजनिक गरेका कार्यक्रमहरुमा जेठ ११ गते हरेक शिक्षक तथा कर्मचारीले केन्द्रबाट बनेको कालो स्टिकरमा राखिएका ६ वटा हाइलाइटेड माग लेखि छातीमा टाँस्ने र टाउकोमा कालोपट्टी समेत बाँधेर फोटो खिचि फेसबुकवालमा पोष्ट गर्ने।

जेठ १३ गते शिक्षक तथा कर्मचारीले नेपाल शिक्षक महासंघले शिक्षा, विज्ञान तथा प्रविधीमन्त्री समक्ष पेश गरेको विरोध-पत्र,माग-पत्र र सम्झौता-पत्रका छायाप्रती आफू रहेको निर्वाचन क्षेत्रभित्रका संघीय तथा प्रदेश सभाका सांसदहरुलाई ई-मेल गर्ने तथा सामाजिक संजालको म्यासेज बक्समा पठाउने।

यसका साथै महासंघले आफ्ना माग सुनवाई नभए १८ गतेबाट तेस्रो चरणको आन्दोलन घोषणा गर्ने समेत बताएको छ।

आइतबार महासंघका सह-अध्यक्ष पूर्ण प्रसाद दवाडी र महासचिव लक्ष्मीकिसोर सुवेदीद्वारा संयुक्त हस्ताक्षर गरेर सार्वजनिक गरिएको एक विज्ञप्तिमा बताइएको छ।