काठमाडौँ /

कोरोना भाइरस महामारी फैलिदै जाँदा राजनीति सँगै चर्चामा रहको क्षेत्र हो अर्थतन्त्र । अर्थतन्त्र अर्थात् पैसाको कारोबार । भाइरस महामारीले गर्दा कुनै मानिसलाई वा व्यापारिक घरानालाई अनि देश र संसारलाई यति व्यापार घाटा भयो, आर्थिक गतिविधि नहुँदा समस्या सिर्जना भयो भनेर हुने गरेका चर्चा वा बहसहरु त तपाईंले पक्कै पनि कहीँ न कहीँ सुन्नु भएकै होला । नेपालमा कोरोना भाइरस महामारीको दोस्रो लहर शुरु भएको यो अवस्थामा त झन् अर्थतन्त्र चलाएमान नभएर थप आर्थिक समस्या आउने हो कि भनेर मानिसहरु त्राहीमाम भएको अवस्था छ ।

तर संसारमा यस्ता मानिसहरु पनि छन् महामारीको समयमा होस् या अरु नै समय, जतिबेला पनि उनीहरुले आफ्नो आम्दानी गरिरहेका हुन्छन् । यही नियमित आम्दानीको कारण नै ती मानिसहरु संसारमा सबैभन्दा धनी बनेका हुन्छन् । हरेक वर्ष फोब्स पत्रिकाले यस्ता संसारका धनीहरुको सूची सार्वजनिक गर्ने गर्छ । हरेक वर्ष अंग्रेजी पात्रो अनुसार मार्च महिनामा सार्वजनिक गरिने संसारका धनी मानिसहरुको सूचीमा यसवर्ष संसारमा २७५५ जना मानिसहरु अटाएका छन् । संसारका सबै अर्बपतिहरुको बारेमा लेख्दा त तपाईं पाठकलाई पढ्न पट्यार लाग्ला, तर आउनुहोस् ती धनीहरुमध्ये ३ जना सबैभन्दा बढी धनीहरुबारे केही जानौं ।

जेफ बेजोस

यो वर्ष संसारका सबैभन्दा धनी मानिसहरुको सूचीमा जेफ बेजोस सबैभन्दा बढी धनी देखिएका छन् अथवा बेजोस अहिले संसारका सबैभन्दा धनी मानिस रहेका छन् । ५७ वर्षका बेजोस अमेरिकाका नागरिक हुन् । उनी अमेजन नामक कम्पनीका मालिक हुन् । उनको कम्पनीबाट विद्युतीय कारोबार (ई–कमर्श), क्लाउड कम्प्युटिङ्ग, आर्टिफिसियल इन्टेलिजेन्समा काम हुनुका साथै कम्प्युटर हार्डवेयरका समान पनि निर्माण हुन्छन् । यो कम्पनीको कुल सम्पती १७७.८७ अरब अमेरिकी डलर रहेको छ । आजभन्दा २६ वर्ष पहिले अर्थात् सन् १९९४ जुलाई ५ का दिन बेजोस आफैले यो कम्पनी स्थापना गरेका थिए । यो कम्पनीको केन्द्रिय कार्यालय अमेरिकाको राजधानी वासिङ्टन नजिकै सियाटल शहरमा रहेको छ । संसारभरी सेवाक्षेत्र रहेको यो कम्पनीका अध्यक्षका साथै प्रमुख कार्यकारी बेजोस आफै रहेका छन् ।

इलोन मस्क

इलोन मस्कको पुरा नाम इलोन रिभ मस्क (Elon Reeve Musk) हो । मस्क हाल संसारका दोस्रो ठुलो धनीको सुचिमा सुचिकृत छन् । उनको जम्मा सम्पती १५१ अरब अमेरिकी डलर रहेको छ । महान राजनितिज्ञ नेन्सल मण्डेलाको देश दक्षिण अफ्रिकाको प्रिटोरिया शहरमा अंग्रेजी पात्रो अनुसार १९७१ जुन २८ को दिन जन्मेका मस्क अहिले ५० वर्षका भएका छन् । उच्च शिक्षाको लागि अमेरिका गएका उनी उतै रहेर प्रगतीगरी संसारभर प्रख्यात भए । मस्कले आमाको माइति देश क्यानाडा पुगेर सन् १९८८ मा त्यहाँको नागरिकता लिए । अमेरिकाको पेन्सिलभेनिया विश्वविद्यालयबाट उच्च शिक्षा लिएका उनले पछि सन् २००२ मा अमेरिकाको पनि नागरिकता लिए । हाल उनीसँग दक्षिण अफ्रिका, क्यानाडा र अमेरिका गरी ३ देशका नागरिकता रहेका छन् । उनी एक उद्यमी ईन्जिनियर र लगानीकर्ता हुन् । उनको अगुवाईमा द बोरिङ्ग कम्पनी, नेउरालिङ्क कम्पनी, टेस्ला कम्पनी मात्रै होइन हाल आएर स्पेस एक्स कम्पनी पनि स्थापना भएको छ । उनी यी सबै कम्पनीका प्रमुख कार्यकारी रहेका छन् । स्पेस एक्स कम्पनीबाट नै उनले अन्तरिक्ष र मंगलग्रहमा समेत यान पठाएका थिए । अमेरिकाको क्यालिफोर्निया स्थित लस एन्जलस शहरमा बस्ने मस्क दुई महिना पहिले केही दिन संसारकै धनी मानिस समेत बनेका थिए ।

बर्नार्ड अर्नाल्ट

फ्रान्सका व्यवसायी बनार्ड संसारको तेस्रो धनीको सूचीमा रहेका छन् । उनको कम्पनी एलभीएमएचले लक्जरी सामानहरुको उत्पादन गरेर वितरण गर्ने गर्दछ । कोरोना भाइरसको महामारीमा यो कम्पनीले अरु कम्पनीहरुको भन्दा बढी समान निर्यात् गरेको छ । एलभीएमएच कम्पनी बनार्ड अर्नाल्टले सन् १०८७ मा स्थापना गरेका थिए । उनको सम्पती हाल १५० अरब अमरिकी डलर रहेको छ । फ्रान्सका स्थायी बासिन्दा बनार्डको एलभीएमएच कम्पनीको मुख्य कार्यालय फ्रान्सको राजधानी शहर पेरिसमा रहेको छ । सो कम्पनीका मुख्य कार्यकारी रहेका उनको कम्पनीबाट लुगा, घडी, गहना, बास्ना आउने अत्तर, भेषभुषाका सामान लगायत उत्पादन भएर संसारभरिका डिपार्टमेन्टल स्टोरहरुमा पुग्ने गर्छन् । सन् १९४९ मार्च ५ का दिन जन्मिएका संसारका तेस्रो धनी मानिस ७२ वर्षीय बनार्ड अर्नाल्ट संसारका तेस्रो धनी मानिस भएपनि उनी फ्रान्सका मात्रै होइन पुरै युरोपका सबैभन्दा पहिलो धनी व्यवसायी हुन् ।