भारतीय चर्चित संगीतकार श्रवण अब यस लोकमा रहेनन् । भारतमा निकै डरलाग्दो गरी फैलिइरहेको कोरोना संक्रमणले सधैं सँगै देखिने संगीतकार नदिम–श्रवणको जोडी छुटाइदिएको छ । संगीत क्षेत्रमा चखेवाका जोडी झैं रहने यी बीचमा वियोगान्त अवस्था आइपरेको छ । नब्बेको दशकमा कयौं गीतमा संगीत भर्ने नदिम–श्रवणको जोडी टुट्दा सबैलाई भावविह्वल अवस्थामा पुर्याएको छ ।

विहीबार श्रवण राठोरको कोरोना संक्रमणबाट उपचार गर्दै गर्दा मुम्बईस्थित रहेजा अस्पतालमा उनको निधन हुन गएको हो । फिल्म ‘आशिकी’ का गीत हिट भएपछि यो जोडीको चर्चा शिखरमा पुगेको हो ।

पहिलो पटक १९७७ मा भोजपुरी फिल्म दंगलका लागि संगीत दिएका नदिम–श्रवणको जोडीले कम्पोज गरेको गीत ‘काशी हिले पटना हिले’ निकै पपुलर भएको थियो । त्यसपछि उनीहरुले संगीत दिएको बलिउड फिल्म ‘जीना सीख लिया’ पनि निकै चर्चामा आएको थियो ।

चर्चाको शिखरमा उक्लनका लागि उनीहरुलाई आशिकी फिल्मका हिट गीतमा भरिएका संगीतले सबल बैसाखीको रुपमा मद्दत गरेका थिए । टी–सिरिज म्युजिक कम्पनीका मालिक गुलशन कुमारको हत्या प्रकरणमा अभियुक्त बनाइएपछि नदिम सन् २००० देखि नै निर्वासनमा रहँदै आएका छन् ।

अहिल भारतको फिल्मी जगतका कलाकारहरुले श्रवण राठोरको निधनमा गहिरो समवेदना व्यक्त गरिरहेका छन् । अल बिदा श्रवण !