एजेन्सी,भारतमा एकैदिन ३ लाखभन्दा बढीमा कोरोना संक्रमण देखिएको छ । भारतीय स्वास्थ्य मन्त्रालयका अनुसार पछिल्लो २४ घण्टामा ३ लाख १४ हजार ८३५ जनामा संक्रमण देखिएको हो । यससँगै भारत एकैदिन सबैभन्दा धेरै कोरोना संक्रमित भेटिने देश बनेको छ ।

यस्तै,पछिल्लो २४ घण्टामा भारतमा २ हजार १०४ जनाको कोरोना संक्रमणका कारण मृत्यु भएको छ ।

हालसम्म भारतमा १ करोड ५९ लाख ३० हजार ९६५ जनामा संक्रमण पुष्टि भइसकेको छ । यस्तै, १ लाख ८४ हजार ६५७ जनाको मृत्यु भइसकेको छ।

हाल भारतमा २२ लाख ९१ हजार ४२८ सक्रिय कोरोना संक्रमित रहेका छन्। आउने दिनमा संक्रमितको संख्या वृद्धि हुने अनुमान गरिएको छ। हाल संक्रमण बढेसँगै भारतका कयौं राज्यहरुमा लकडाउन लागू गरिएको छ। अस्पतालहरु बिरामीले भरिएका छन् । भारतको स्वास्थ्य क्षेत्र कोभिड १९ का कारण अस्तव्यस्त बनेको छ।