एजेन्सी, भारतमा एकदिनमा अहिलेसम्मकै सबैभन्दा धेरै कोरोनाभाइरसका संक्रमित थपिएका छन् । भारतीय सञ्चारमाध्यमहरूका अनुसार मंगलबार १ लाख ८५ हजार २ सय ४८ जनामा कोरोनाको संक्रमण पुष्टि भएको हो । योसँगै भारतमा कुल संक्रमितको संख्या १ करोड ३८ लाख ७३ हजार ८ सय २५ पुगेको छ ।
यस्तै पछिल्लो २४ घण्टामा भारतमा कोरोना संक्रमणबाट थप १ हजार २७ जनाको मृत्यु भएको छ । हालसम्म भारतमा कोरोनाबाट मृत्यु हुनेको संख्या १ लाख ७२ हजार ८५ पुगेको भारतीय सञ्चारमाध्यमहरुले जनाएका छन् ।
गत २४ घण्टामा भारतमा ८२ हजार ३३९ जना संक्रमणमुक्त भएका छन् । त्यहाँ सक्रिय संक्रमितको संख्या १३ लाख ६५ हजार ७०४ रहेको छ ।
भारतमा हालसम्म ११ करोड ११ लाख ७९ हजार ५७८ जनालाई कोरोना विरुद्धको खोप दिइसकिएको त्यहाँको स्वास्थ्य तथा परिवार कल्याण मन्त्रालयले जानकारी दिएको छ ।