☰
प्रकाश गुरागाईं:
पृथ्वी झुण्डिएको छ रूखमा
अन्तरीक्षमा घुमिरहेका छन् अरिङ्गालहरू !
रूख कटुस हो
रूख चिलाउने हो
रूख उत्तिस हो
रूख जेसुकैको होस्
त्यो पृथ्वीको टेको हो ।
बोलीमा खिल नभएकाहरू
अरिङ्गालबाट लखेटिएर
पृथ्वी भन्दा तल झरेका छन् ।
रूखको फेदमा उभिएका केटाकेटी
गुलेलीले पृथ्वी ताकेर उभिएका छन्
टुप्पोबाट झारेर भूइँमा
उनीहरू चाहन्छन् पृथ्वीको भकुन्डो खेल्न
भकुन्डो बनाउन अरिङ्गालको गोलो
अरिङ्गालहरू अन्तरीक्षमा फन्को मारिरहेका छन् ।
केटाकेटाहरू पृथ्वीमै उभिएका छन्
तर रूखमाथि
कसैले झुण्डाएको छ अर्को पृथ्वी त्यो पृथ्वीको विभाजन हो ।
शासकहरूको झैँ
अरिङ्गालहरूको पनि सिमाना हुन्छ
केटाकेटीहरू अरिङ्गालको राज्यमा छन्
केटाकेटीहरू गुलेली खेलिरहेका छन्
अरिङ्गाल केटाकेटीतिरै आइरहेछन् ।
अब केटाकेटीहरूले सिक्नेछन् विद्रोहको गीत ।
(स्रोत : साहित्यिक मासिक, श्रृंखला, २०७७ जेठबाट)
