छत्तीसगढ । सुरक्षाकर्मी र भारतीय माओवादी छापामारबीच छत्तीसगढमा भएको चार घण्टा लामो सशस्त्र भिडन्तमा २२ जना सुरक्षाकर्मीको मृत्यु भएको त्यहाँका सञ्चार माध्यमले जनाएका छन् । भिडन्त हुँदै गर्दा प्राप्त सुरु खबरमा सुरक्षाकर्मीको थोरै संख्यामा हताहती भएको समाचार बाहिर आए पनि पछिल्लो खबर अनुसार यो संख्या बढेर २२ सम्म पुगेको छ ।

शनिवार छत्तीसगढको बीजापुरमा भएको यो ठूलो मुठभेडमा सुरक्षा फौजका उच्च पदस्थ एएसआई दीपक भारद्वाज पनि मारिएका छन् । नक्सलवादीको खोजीमा उक्त इलामा प्रवेश गरेका सुरक्षाफौज र माओवादी छापामारका बीचमा लामो समय भिडन्त भएको थियो ।

यो भिडन्तमा माओवादी तर्फ पनि हताहती भएको सुरक्षाकर्मीको दाबी रहेको छ । भिडन्तमा भएको हताहतीको स्थिति र सुरक्षाकर्मीको शब भेटिएको दुरीलाई हेर्ने हो भने दुवै पक्षबीच निकै लखेटालखेट भएको देखिन्छ । एक किलोमीटर परसम्म सुरक्षा कर्मीको लाश भेटिएकाले यो भिडन्त मोर्चाबद्ध भएको देखिन आउँछ । भिडन्तको खबर पाएपछि घटनास्थल पुगेको स्पेशल टास्क फोर्सले चारैतिर छरपष्ट रहेका सुरक्षाकर्मीका शब उठाएको थियो ।

भारतीय गृहमन्त्रालयले भिडन्तमा ज्यान गुमाएका सुरक्षाकर्मीप्रति दुःख व्यक्त गरेको छ । साथै, पछिल्लो पटक भएको माओवादीको सबैभन्दा भयानक हमला भनेर टिप्पणी पनि गरिसकेको छ । भारतका गृहमन्त्री अमित साह र छत्तीसगढका मुख्यमन्त्री भूपेश बघेलले फेरि पनि माओवादी बिद्रोहीहरुलाई तह लगाएर छाड्ने बाचा दोहर्याएका छन् ।

दुवैले छुट्टाछुट्टै गरेका प्रेस भेटघाटमा भारतीय माओवादी र सुरक्षाफौजका बीचमा चार घन्टासम्म निरन्तर मुठभेड चलेको र माओवादीतर्फ पनि हताहती भएको जनाएका छन् । उनीहरुले दिएको जानकारी अनुसार शुक्रबार  मात्र माओवादीलाई ‘घेरा हाल र सखाप पार’ भन्ने रणनीतिका साथ सुकमा र बीजापुरका विभिन्न इलाकामा सीआरपीएफ्, डिस्ट्रिक्ट रिजर्व गार्ड, स्पेशल टास्क फÞोर्स तथा कोबरा बटालियन का २०६९ अफिसर तथा जवान प्रवेश गरेका थिए ।

यीमध्ये नरसापुर क्याम्पबाट ४२०, मिनपा क्याम्पबाट ४८३, उसुर क्याम्पबाट २०० र पामेड क्याम्पबाट १९५ तथा तर्रेम क्याम्पबाट ७६० अफिसर तथा जवान एकीकृत रुपमा परिचालन गरिएका थिए ।

शनिवार विभिन्न स्थानमा गरिएको अपरेशनपछि फर्कदै गर्दा तर्रेम थाना पुग्न पार गर्नुपर्ने जोन्नागुण्डाको जंगलमा माओवादी छापामारले सुरक्षाफौजमाथि धावा बोलेका थिए । यही क्षेत्रमा नै ठूलो भिडन्त भएको थियो ।