☰
रुपन्देही । शिक्षा, विज्ञान तथा प्रविधि मन्त्रालयले देशभरका शिक्षण संस्था चार दिन बन्द गर्ने निर्णय गरे पनि सरकारको नियम उल्लंघन गर्दै रुपन्देही जिल्ला अन्तर्गत कन्चन गाउँपालिकाका विद्यालयहरु भने धमाधम संचालन भएका छन् ।
शुक्रबारदेखि काठमाडौं उपत्यकासहित देशका विभिन्न स्थानमा वायु प्रदूषत निकै बढेकोले मंगलबार एक विज्ञप्ति जारी गरी विद्यालय बन्द गर्न आह्वान गरेको हो । यता सरकारको नियम नमान्दा पनि स्थानीय सरकार भने मौन देखिएको छ ।
यस सम्बन्धमा कन्चन गाउँपालिकाका अध्यक्ष गोकर्ण बहादुर क्षेत्रीले सरकारको नियम नमान्नेलाई कारबाही गर्ने बताएका छन् । स्थानीयका अनुसार स्थानीय सरकार बलियो नभएको र जनताले नीति नियम नमानेको दाबी गरेका छन् ।
गाउँपालिका भित्र १९ ओटा सरकारी र ११ ओटा निजि गरि जम्मा ३० विद्यालय संचालित छन् । सरकारको नियम अनुसार नै सरकारी विद्यालय बन्द भए भने निजि बिद्यालयहरुमा पठनपाठन संचालन रहदा विद्यार्थीहरुले आफ्नो स्वास्थ्यमाथी स्थानीय सरकार र विद्यालयले खेलवाड गरेको गुनासो गरेका छन् ।
जल तथा मौसमविद्का अनुसार लामो समयको खडेरीले हावा सुख्खा भएको छ र हावाले पानी पार्ने बादलको साटो धुलो र धुवाँ लिएर आएको छ । यसका साथै डढेलोका घटना बढेकाले वायु प्रदूषित भएको विज्ञहरुको भनाइ छ ।
वायु प्रदूषणका कारण बालबालिकाको स्वास्थ्यमा गम्भीर असर पर्ने भन्दै मन्त्रालयले विद्यालय बन्द गर्ने निर्णय गरेको थियो ।
