एजेन्सी, सैनिक ’कू’ गरेर सत्ता हातमा लिएको म्यानमारको सेनाले नागरिकमाथि दमन र हिंसा बढाएको छ । शनिबार मात्रै विभिन्न ४४ शहरमा म्यानमारको सेनाले ११४ जनाभन्दा धेरैको हत्या गरेको छ । सडकमा देख्नेबित्तिकै सेनाले गोली चलाएर हत्या गर्ने गरेको छ । अहिलेसम्म सेनाको गोली प्रहारबाट चार सय बढी बर्मेली नागरिकको हत्या भइसकेको छ ।

सुरुमा ब्यापक धरपकडमा उत्रिएको सेना पछिल्लो समय दमनमा लागेको छ । सडकमा कसैलाई देख्नेबित्तिकै गोली चलाएर मार्ने आदेश पाएको सेनाको अन्तराष्ट्रिय रुपमा चर्को आलोचना हुँदै आएको छ ।

यता अमेरिकाले भने शनिवारको घटनालाई ’भयभीत बनाउने घटना’ भन्दै सैन्य सरकारको विरोध गरेको छ। त्यस्तै बेलायत, संयुक्त राष्ट्रसंघ, युरोपियन युनियनले पनि शनिवारको घटना सैन्य सरकारको दमन भएको भन्दै विरोध जनाएको छ।