काठमाडौं । त्रिभुवन विश्वविद्यालय (त्रिवि) का सात प्राध्यापक कारबाहीमा परेका छन् ।

त्रिविका कार्यकारी परिषद्ले बौद्धिक चोरीको गर्ने सात प्राध्यापकलाई कारवाही गरेको हो । प्राध्यापकहरुले अनाधिकृत रुपमा लेखहरु साभार गरेको भन्ने उजुरी परेपछि त्रिविले प्राध्यापक डा. रामचन्द्र बस्नेतको संयोजकत्वमा गठित तीन सदस्यीय छानविन समितिले अनुसन्धान अघि बढाएको थियो । उक्त समितिले अध्ययन गरी प्रमाणसहित प्रतिवेदन पेश गरेपछि प्राध्यापक विरुद्ध कारबाही अघि बढाएको थियो ।

त्रिविको विराटनगरस्थित महेन्द्र मोरङ बहुमुखी क्याम्पसका रसायन शास्त्रका प्राध्यापक डा. पर्शुराम मिश्र, आंशिक प्राध्यापक रोहित देव, सहप्राध्यापक जनक अधिकारी, युवराज साहु , विमल कण्ठ, हरेराम मिश्र र कल्पना मिश्रलाई कारवाही गरिएको हो ।

त्रिविले बौद्धिक चोरीमा संलग्न ७ जनालाई नै आगामी २ वर्ष सम्म त्रिविका विद्यार्थीहरुको सुपरिवेक्षण, थेसिस, गाइड लगायतका अनुसन्धनात्मक क्रियाकलापहरुमा समेत गर्न प्रतिबन्ध लगाएको छ ।

यसैगरी प्रा.डा मिश्र लगायत सो कार्यमा संलग्न सबैलाई यस्तो कार्यमा संलग्न नहुन सचेत गराउने र त्रिवी महेन्द्र मोरंग आर्दश बहुमुखी क्याम्पसमा आंशिक प्राध्याकको रुपमा संलग्न रहेका रोहित कुमार देवलाई आगामी २ वर्षसम्म अध्यापन गर्न नपाउने गरी कारबाही गरिएको त्रिविले जारी गरेको विज्ञप्तिमा उल्लेख छ ।