काठमाडौँ /

नेपाली गीत संगीतको बजारमा ‘के यस्तो माया बस्यो नि’ गीतको म्यूजिक भिडियो सार्वजनिक भएको छ । तेस्रो नेपाल आइडल, सज्जा चौलागाईं र अर्को गायन रियालिटी शो ‘द भ्वाइस अफ नेपाल’बाट चर्चामा आएका गायक बलबहादुर राजवंशीको स्वरमा सो गीत सजिएको छ ।

हरि लम्सालको शब्द सिर्जना रहेको सो गीतमा संगीत सिर्जना समेत लम्साल आफैले गरेका छन् । एक्वाइस्टिक स्टुडियोमा रेकर्ड भएको सो गीतमा पोषणले मादल बजाएका छन् भने संजीव बराइलीले गिटार र उमेश पण्डितले बाँसुरी बजाएका छन् । राजुबाबु चौधरी र अजय कार्कीले रेकर्ड गरेको सो गीतलाई चन्द्र चौधरीले मिक्सिङ र मास्टरिङ गरेका छन् ।

निकेश खड्काले निर्देशन गरेको सो गीतको उक्त भिडियोमा नाजिर हुसेन र सुरबिना कार्कीको जीवन्त अभिनय रहेको छ । भिडियोलाई बुद्ध थापाले क्यामरामा कैद गरेका हुन् । बिकास धमलाले सम्पादन गरेको सो गीतको भिडियोमा गाँउमा जन्मिएर गाँउमै बढेका युवा युवतीले गाँउको सेरोफेरोमा हुर्किएको चोखो प्रेमलाई अभिनय मार्फत व्यक्त गर्न खोजिएको छ ।

हेरौं भिडियो